Live Updates

لاہورقلندرزاورپشاورزلمی کی ٹیمیں پی ایس ایل کے 14ویں میچ میں کل پنجہ آزمائی کریں گی

بدھ 23 اپریل 2025 22:20

اسلام آباد(اُردو پوائنٹ اخبارتازہ ترین - آن لائن۔ 23 اپریل2025ء) پاکستان سپر لیگ 10 میں کل (جمعرات کو)واحد میچ لاہور قلندرز اور پشاور زلمی کے مابین کھیلا جائے گا۔ پاکستان کرکٹ بورڈ(پی سی بی )کے زیر اہتمام پی ایس ایل کے دسویں ایڈیشن کے دلچسپ مقابلوں کا سلسلہ جاری ہے،جس میں شائقین کرکٹ کو انتہائی دلچسپ اور کانٹے دار مقابلے دیکھنے کو مل رہے ہیں۔

لیگ کے 14 ویں میچ میں جمعرات کو لاہور قلندرز اور پشاورزلمی کی ٹیمیں قذافی کرکٹ سٹیڈیم،لاہور میں مدمقابل ہوں گی۔ میچ رات 8 بجے شروع ہو گا اور فلڈ لائٹس کی روشنی میں کھیلا جائے گا۔لاہور قلندرز کو مایہ ناز آل رائونڈر شاہین شاہ آفریدی لیڈ کر رہے ہیں اور دیگر نمایاں کھلاڑیوں میں حارث رئوف ، فخر زمان،عبد اللہ شفیق ،محمد نعیم،آصف علی،ڈیرل مچل،ڈیوڈ ویس، کوسل پریرا،ٹم کیورن اور ثام بلنگز شامل ہیں۔

(جاری ہے)

لاہور قلندرز کی ٹیم لیگ میں 4 میچز کھیل چکی ہے جن میں اس کو دو میں فتح اور دو میں شکست کا سامنا کرنا پڑا ہیاور وہ 4 پوائنٹس کے ساتھ پوائنٹس ٹیبل پر تیسری پوزیشن پر ہے۔پشاور زلمی کی ٹیم مایہ ناز بلے باز بابر اعظم کی زیر قیادت میدان میں اترے گی، دیگر نمایاں کھلاڑیوں میں صائم ایوب،عبدالصمد،مچل اون ،محمد حارث،محمد علی،ناہید رانا،الزاری جوزف،عارف یعقوب،لیوک ووڈ اور علی رضا شامل ہیں۔پشاور زلمی کی ٹیم چارمیچز کھیل چکی ہے جن میں اس کو ایک میچ میں فتح نصیب ہوئی جبکہ تین میں شکست ہوئی ہے۔پشاور کی ٹیم ٹیبل پر دو پوائنٹس کے ساتھ چوتھے نمبر پر ہے۔ ٹورنامنٹ کا فائنل 18 مئی کو قذافی سٹیڈیم، لاہور میں کھیلا جائے گا۔