وزیراعلی مریم نوازسے ارکان صوبائی اسمبلی کی ملاقات،صوبہ بھر میں جاری ترقیاتی کاموں پر تبادلہ خیال

بدھ 23 اپریل 2025 23:13

لاہور (اُردو پوائنٹ اخبارتازہ ترین - اے پی پی۔ 23 اپریل2025ء) وزیراعلی پنجاب مریم نوازسے فیصل آباد ڈویژن کے ارکان صوبائی اسمبلی عارف محمود گل اور آغا علی حیدر نے ملاقات کی۔ ملاقات میں سیاسی امور اور صوبے بھر میں جاری ترقیاتی کاموں پر تبادلہ خیال کیا گیا۔اس موقع پرارکان صوبائی اسمبلی نے وزیراعلی مریم نواز کو صوبے میں ریکارڈ ترقیاتی کام شروع کرانے پر شکریہ ادا کیا۔

ارکان اسمبلی نے مہنگائی میں کمی اور پنجاب کی تاریخ کے سب سے زیادہ پراجیکٹ کی کامیاب لانچنگ پرمبارکباددی۔ انہوں نے کہا کہ مریم نواز حقیقی معنوں میں عوام کی خدمت کا جذبہ رکھتی ہیں اورادویات کاتمام سرکاری ہسپتالوں سے فری ملنا پنجاب حکومت کی کارکردگی کو چارچاند لگارہا ہے۔رکن صوبائی اسمبلی عارف محمود گل نے کہا کہ سالڈ ویسٹ مینجمنٹ اور ستھرا پنجاب پروگرام سے شہروں اور دیہات میں یکساں صفائی کا نظام قابل تحسین ہے۔

(جاری ہے)

رکن صوبائی اسمبلی آغا علی حیدر نے کہا کہ اپنی چھت،اپنا گھر پروگرام سے وزیراعلی مریم نواز صوبے کے لوگوں میں گھرکررہی ہے۔ وزیراعلی مریم نواز نے ارکان صوبائی اسمبلی سے گفتگو کرتے ہوئے کہا کہ پنجاب کے عوام کی زندگیوں میں آسانیاں اور بہتری لانا ہی میرا خواب ہے، قائد محمد نوازشریف کی قیادت میں پنجاب کو ترقی کی راہ پر گامزن کرچکے ہیں، پاکستان کے عوام کی خدمت کرنا ہی مسلم لیگ (ن)کا کام ہے۔ وزیراعلی نے کہا کہ عوام سے کیے وعدے انشا اللہ پورے کریں گے۔