روات پولیس کی کارروائی، کسٹم اہلکار ظاہر کرکے شہری کو لوٹنے میں مصروف4 رکنی گینگ گرفتار

شہری سے اسلحہ کی نوک پر چھینی گئی گاڑی ، جعلی نمبر پلیٹیں، ہتھکڑی، ریوالونگ لائٹ، وائرلیس سیٹ اور اسلحہ برآمد

جمعرات 24 اپریل 2025 19:55

راولپنڈی(اُردو پوائنٹ اخبارتازہ ترین - این این آئی۔ 24 اپریل2025ء)روات پولیس نے خود کو کسٹم اہلکار ظاہر کرکے شہری کو لوٹنے میں مصروف4 رکنی گینگ گرفتارکرکے شہری سے اسلحہ کی نوک پر چھینی گئی گاڑی ،جعلی نمبر پلیٹیں، ہتھکڑی، ریوالونگ لائٹ، وائرلیس سیٹ اور اسلحہ برآمدکرلیا۔ تفصیلات کے مطابق روات پولیس نے کارروائی کرتے ہوئے خود کو کسٹم اہلکار ظاہر کرکے شہری کو لوٹنے میں مصروف4 رکنی گینگ کو گرفتار کرلیا،گرفتار ملزمان کی شناخت زیشان، حسن، اسد اور فرحان کے نام سے ہوئی، شہری سے اسلحہ کی نوک پر چھینی گئی گاڑی برآمد، ملزمان سے جعلی نمبر پلیٹیں، ہتھکڑی، ریوالونگ لائٹ، وائرلیس سیٹ اور اسلحہ بھی برآمدہوا، ملزمان شہری سے واردات کر رہے تھے کہ پولیس نے مشکوک جان کر چیک کیا،ملزمان نے اپنا تعارف کسٹم اہلکاروں کے طور پر کروایا جو تحقیقات پر ثابت نہ کر سکے، ملزمان خود کو سرکاری ادارے کے اہلکار ظاہر کر کے گاڑیاں روکتے اور شہریوں کو لوٹتے تھے، گرفتار ملزمان کو شناخت پریڈ کے لیے جیل منتقل کیا جا رہا ہے۔

(جاری ہے)

بروقت اور موثر کارروائی پر ایس پی صدر نے اے ایس پی صدر، ایس ایچ او روات اور ٹیم کو شاباش دیتے ہوئے کہا کہ سرکاری ادارے کے اہلکاروں کے روپ میں وارداتیں کرنے والا گینگ متعدد وارداتوں میں مطلوب تھا، ملزمان سے تفتیش میں اہم انکشافات اور مزید برآمدگی متوقع ہے، شہریوں کی جان و مال پر حملہ کرنے والوں سے آہنی ہاتھوں سے نمٹا جائے گا۔