ریلوے انتظامیہ کامحمود بوٹی اور پتوکی میں ناجائز قابضین کے خلاف آپریشن، کروڑوں روپے مالیت کی 23 کنال 2 مرلہ سرکاری زمین واگزار کروالی

جمعہ 25 اپریل 2025 22:40

لاہور (اُردو پوائنٹ اخبارتازہ ترین - اے پی پی۔ 25 اپریل2025ء) ڈویژنل سپرنٹنڈنٹ ریلوے لاہور میاں طارق لطیف کی قیادت میں ریلوے انتظامیہ لاہور ڈویژن قبضہ مافیا کے خلاف متحرک. تفصیلات کے مطابق ڈی ایس ریلوے لاہور میاں طارق لطیف کی ہدایات کے مطابق ڈویژنل ٹیم (ڈپٹی ڈویژنل سپرنٹنڈنٹ مکینیکل میاں عبدالوقاص، ڈویژنل ایگزیکٹو انجینیئر حاجی محمد، ڈپٹی ڈائریکٹر پراپرٹی اینڈ لینڈ ریاض محمود لاشاری ، ڈی ایس پی شہزاد، ایس ایچ او رمضان حیدر کے علاوہ انسپکٹر آف ورکس یاسر عرفات) نے ریلوے پولیس کی مدد سے محمود بوٹی میں ناجائز قابضین کے خلاف کامیاب آپریشن کیا۔

(جاری ہے)

کامیاب آپریشن کے دوران 22 دوکانیں، 5 گودام، 5 کولڈ سٹوریج اور ایک وزن کا کانٹا سیل کر دیا گیا جوکہ پانچ کنال 2 مرلہ زمین پر مشتمل تھا جس کی مالیت 26 کروڑ روپے بنتی ہے۔ اس کے علاوہ پتوکی نرسریوں کے خلاف اینٹی انکروچمنٹ آپریشن بھی کیا گیا جس کے دوران 18 کنال زمین واگزار کروالی گئی۔ اس موقع پر ڈویژنل سپرنٹنڈنٹ ریلوے لاہور میاں طارق لطیف کا کہنا تھا کہ قبضہ مافیا کے خلاف بلا تفریق کاروائیاں جاری رکھیں گے اور ریلوے زمین کی ہر قیمت پر حفاظت یقینی بنائی جائے گی۔