خیبرپختونخوا بے پناہ قدرتی وسائل، تاریخی ورثے اور انسانی صلاحیتوں سے مالا مال صوبہ ہے، فیصل کنڈی

ہفتہ 12 جولائی 2025 21:50

پشاور(اُردو پوائنٹ اخبارتازہ ترین - این این آئی۔ 12 جولائی2025ء)گورنر خیبرپختونخوا فیصل کریم کنڈی نے کہا ہے کہ خیبرپختونخوا بے پناہ قدرتی وسائل، تاریخی ورثے اور انسانی صلاحیتوں سے مالا مال صوبہ ہے، لیکن بدقسمتی سے ترقی کی دوڑ میں پیچھے رہ گیا ہے۔ اب وقت آ گیا ہے کہ ہم سب مل کر اس صوبے کو ترقی، خوشحالی اور سرمایہ کاری کا مرکز بنائیں۔ان خیالات کا اظہارانہوں نے ہفتہ کے روز گورنر ہاؤس پشاور میں برین ڈیزائنرکے زیراہتمام ایکسپلور اینڈ انویسٹ خیبر پختونخوا ریجن کے عنوان سے منعقدہ چھٹی کانفرنس سے بحیثیت مہمانِ خصوصی خطاب کر تے ہوئے کیا۔

کانفرنس میں برین ڈیزائنر کے سی ای او محمدرؤف راجہ، ڈپٹی ایمبیسڈر ملائشیا، ملک بھر سے کاروباری شخصیات، چیمبرز کے عہدیداران اور دیگرکاروباری شخصیات نے شرکت کی۔

(جاری ہے)

کانفرنس میں صوبے میں سرمایہ کاری کے مواقع اور ملکی ترقی سے متعلق امور پر پینلست نے اپنی آراء پیش کیں-اس موقع پر گورنر خیبر پختونخوا نے مختلف کاروباری شخصیات میں ایوارڈ بھی تقسیم کئی- کانفرنس سے خطاب کرتے ہوئے گورنر نے ملک بھر کی کاروباری شخصیات کو گورنر ہاؤس آمد پر خوش آمدید کہتے ہوئے کہا کہ آج کی کانفرنس میں پیش کی جانے والی تجاویز کو متعلقہ فورمز کیساتھ اٹھایا جائے گا اور گورنر ہاؤس کیجانب سے مکمل تعاون یقینی بنایا جائے گا، انہوں نے کہا کہ خیبرپختونخوا ابھرتا ہوا تجارتی، صنعتی، سیاحتی اور ٹیکنالوجی کا مرکز بن چکا ہے۔

یہاں سرمایہ کاری کے بے شمار مواقع موجود ہیں، جن میں قابلِ تجدید توانائی، معدنیات، زرعی صنعت، آئی ٹی اور سیاحت کے شعبے نمایاں ہیں۔ انہوں نے کہا کہ حکومت نے ٹیکس اصلاحات، خصوصی اقتصادی زونز اور سرمایہ کار دوست پالیسیوں کے ذریعے کاروباری ماحول کو بہتر بنایا ہے۔انہوں نے اس بات پر زور دیا کہ خیبرپختونخوا کے عوام بالخصوص نوجوان طبقہ ہی اصل طاقت ہیں۔

حکومت ان کی فنی تربیت، ٹیکنالوجی کی تعلیم اور رہنمائی پر توجہ دے رہی ہے تاکہ ایک باصلاحیت، ہنرمند اور کاروبار دوست نسل تیار ہو۔ گورنر نے کہا کہ آرٹیفیشل انٹیلیجنس اور انفارمیشن ٹیکنالوجی کے اس دور میں پاکستان کے نوجوان ہر میدان میں عالمی سطح پر کامیابیاں سمیٹ سکتے ہیں، ضرورت صرف رہنمائی اور مواقع فراہم کرنے کی ہے۔ گورنرنے کہا کہ خیبرپختونخوا کی ترقی و خوشحالی کیلئے اجتماعی کوششوں کی ضرورت ہے۔ایک دوسرے کیساتھ ہاتھ ملائیں اور اس صوبے کو ترقی یافتہ بنانے کیلئے کردار ادا کریں۔انہوں نے کہا کہ فیڈریشن آف پاکستان چیمبرز اینڈ کامرس اینڈ انڈسٹریز کو آئندہ ایوارڈ تقریب گورنر ہاؤس میں منعقد کرنیکی دعوت دیتا ہوں۔