Live Updates

پاکستان کی اجازت ، ناپسندیدہ قرار دیا گیا بھارتی سفارتی عملہ اسلام آباد سے لاہور روانہ

بھارت کے فوجی، بحری اور فضائی سفارت کار آج واہگہ کے راستے بھارت واپس لوٹ جائیں گے،بھارتی ہائی کمیشن نے اپنے ناپسندیدہ قرار دئیے گئے سفارتی عملے کی واہگہ بارڈر کے راستے بھارت واپسی کیلئے پاکستانی حکام کو تحریری درخواست دی تھی

فیصل علوی ہفتہ 26 اپریل 2025 15:10

اسلام آباد(اردوپوائنٹ اخبار تازہ ترین۔26اپریل 2025)پاکستان حکام کی اجازت ملنے کے بعد ناپسندیدہ قرار دیاگیا بھارتی سفارتی عملہ اسلام آباد سے لاہور روانہ ہوگیا، بھارت کے فوجی، بحری اور فضائی سفارت کار آج واہگہ کے راستے بھارت واپس لوٹ جائیں گے،سفارتی ذرائع کا کہنا ہے کہ بھارتی ہائی کمیشن نے پاکستانی حکام کو تحریری درخواست کی تھی، جس پرپاکستان نے بھارتی سفارت کاروں کو لاہور کے سفر کی اجازت دیدی تھی۔

بتایا گیا ہے کہ پاکستانی حکام کی جانب سے اجازت ملنے کے بعد بھارت کے ناپسندیدہ قرار ددئیے گئے سفارتی حکام لاہو روانہ ہوگئے جہاں سے وہ واہگہ بارڈر کے ذریعے بھارت روانہ ہوجائیں گے۔سفارتی ذرائع کے مطابق بھارت کی جانب سے پاکستانی حکام سے اپنے ناپسندیدہ دئیے گئے سفارتی عملے کی لاہور سے واہگہ بارڈر کے ذریعے سفر کی اجازت مانگی گئی تھی۔

(جاری ہے)

پاکستان نے بھارت کے دفاعی، ایئر، نیول اتاشیوں اور معاون اسٹاف کو ناپسدیدہ شخصیات قرار دیا تھا۔دوسری جانب پاکستان اور بھارت کے مابین کشیدگی بڑھنے کے بعد دونوں ملکوں کے شہریوں کی واہگہ بارڈر سے واپسی کا سلسلہ جاری ہے۔گزشتہ روز بھی واہگہ بارڈر کے راستے 191 پاکستانی شہری بھارت سے واپس پاکستان پہنچے تھے جبکہ پاکستان سے 287 بھارتی شہر ی واہگہ بارڈر کے راستے واپس اپنے وطن گئے تھے۔

پاکستان اور بھارت کے درمیان کشیدگی کی وجہ سے اٹاری بارڈر بند رہا تھا۔ لیکن شہریوں کی اپنے ملک واپسی کیلئے واہگہ بارڈر کھلا رہاتھا۔ پاکستان میں اپنے رشتہ داروں سے ملنے آنے والے بھارتی شہری معمول کی چیکنگ کے بعد واپس اپنے ملک لوٹ گئے تھے۔پاکستان نے 3 روز پہلے سارک ویزا استثنیٰ پر موجود بھارتی شہریوں کو 48 گھنٹوں میں پاکستان چھوڑنے کا حکم دیا تھا۔اسی طرح بھارت نے سارک ویزا کے تحت استثنیٰ کے حامل پاکستان شہریوں کو 48 گھنٹوں تک ملک چھوڑنے کا کہا گیا تھا۔