کراچی: گارڈن تھانے کا پولیس اہلکار گرفتار، گزشتہ سال چوری کی گئی 125 موٹر سائیکل برآمد

پولیس نے کولڈ ڈرنک ڈپو میں ڈکیتی اور خاتون کے موبائل فون چوری میں ملوث 2 ملزمان کو بھی گرفتار کرلیا

اتوار 27 اپریل 2025 14:45

کراچی(اُردو پوائنٹ اخبارتازہ ترین - این این آئی۔ 27 اپریل2025ء)عیدگاہ پولیس نے گارڈن تھانے کے پولیس اہلکار کو گرفتار کر کے گزشتہ سال چوری کی گئی موٹر سائیکل برآمد کرلی ، پولیس نے رمضان کے آخری عشرے میں کولڈ ڈرنک ڈپو میں ڈکیتی اور خاتون کے موبائل فون چوری میں ملوث 2 ملزمان کو بھی گرفتار کرلیا ۔

(جاری ہے)

تفصیلات کے مطابق عیدگاہ پولیس نے دوران گشت موٹر سائیکل سوار پولیس اہلکار مدثر کے قبضے سے چوری کی گئی 125 موٹر سائیکل برآمد کر کے گرفتار کرلیا ، ایس ایچ او عیدگاہ شعور بنگش نے بتایا کہ مسروقہ موٹر سائیکل گزشتہ سال ستمبر میں عیدگاہ تھانے کی حدود سے چوری کی گئی جس کا مقدمہ بھی درج ہے جبکہ گرفتار پولیس اہلکار گارڈن تھانے میں تعینات اور گارڈن پولیس ہیڈکوارٹر میں رہائش پذیر ہے۔

تاہم گرفتار پولیس اہلکار کو مزید تفتیش کے لیے اینٹی وہیکل لفٹنگ سیل پولیس کے حوالے کر دیا ہے جو مزید تفتیش کر رہی ہے، انھوں نے بتایا کہ رمضان المبارک کے آخری عشرے میں کولڈ ڈرنگ کے ڈپو میں ساتھیوں کے ہمراہ ڈکیتی کے دوران ایک لاکھ روپے نقدی اور 2 موبائل فون چھین کر فرار ہونے والے ڈاکو زین کو گرفتار کرلیا جبکہ پولیس نے ایک ملزم سلمان اسحاق کو بھی گرفتار کیا ہے جو خاتون کا موبائل فون چوری کر کے فرار ہوا تھا ۔