اسرائیلی فوج کی غزہ میں اپنے مزید 2 افسروں کی ہلاکت کی تصدیق

اتوار 27 اپریل 2025 16:30

مقبوضہ بیت المقدس (اُردو پوائنٹ اخبارتازہ ترین - این این آئی۔ 27 اپریل2025ء)اسرائیل نے غزہ میں اپنے مزید 2 فوجیوں کی ہلاکت کی تصدیق کردی ہے۔اسرائیلی میڈیا کے مطابق غزہ کے محلے شجاعیہ میں مزاحمت کاروں کے حملے میں مزید 2 فوجی ہلاک ہوگئے۔آئی ڈی ایف کے مطابق مزاحمت کاروں نے شجاعیہ میں گھات لگا کر حملہ کیا جس میں اسرائیلی فوج کے کیپٹن اور پلاٹون کمانڈر سمیت اسرائیلی بارڈر پولیس کی خفیہ یونٹ کا کمانڈو مارا گیا۔

(جاری ہے)

آئی ڈی ایف کے مطابق مرنے والے دونوں فوجی غزہ کی سرحد کے ساتھ بفر زون کو بڑھانے کی کارروائی میں شریک تھے۔اسرائیلی فوج کے مطابق حملے میں کچھ فوجی زخمی بھی ہوئے، زخمیوں کو علاقے سے نکالنے میں تقریباً دو گھنٹے لگے، اس دوران فلسطینی مزاحمت کاروں سے شدید لڑائی ہوئی۔اسرائیلی فوج کے مطابق پلاٹون کمانڈر ایٹنی ٹینک میزائل کے حملے میں مارا گیا جس میں اس کا ٹینک بھی ناکارہ ہوگیا۔آئی ڈی ایف کیمطابق 7 اکتوبر کو شروع ہونے والی جنگ میں اب تک ہلاک اسرائیلی فوجیوں کی تعداد 849 ہوگئی ہے۔