ڈپٹی کمشنر سیالکوٹ کا علامہ اقبال میموریل ٹیچنگ ہسپتال کا دورہ

پیر 28 اپریل 2025 17:10

سیالکوٹ (اُردو پوائنٹ اخبارتازہ ترین - اے پی پی۔ 28 اپریل2025ء) ڈپٹی کمشنر سیالکوٹ صبا اصغر علی نے علامہ اقبال میموریل ٹیچنگ ہسپتال کا اچانک دورہ کیا اور فرائض سے غفلت اور مریضوں کی شکایات پر سینئر رجسڑار ڈاکٹر سدرہ کی معطلی کے احکامات جاری کرتے ہوئے انکوائری کا آغاز کر دیا۔ وہ صبح آٹھ بجے ہسپتال پہنچیں اور ڈیڑھ گھنٹے تک ہسپتال میں موجود رہیں اور تین میڈیکل کنسلٹنٹس سے بغیر پیشگی اطلاع کے ڈیوٹی پر موجود نہ ہونے پر وضاحت طلب کرنے کے احکامات بھی جاری کئے۔

(جاری ہے)

ڈپٹی کمشنر سیالکوٹ نے میڈیکل وارڈز، ایمرجنسی، پیڈز اور گائنی وارڈز کا معائنہ کیا اور انہوں نے ادویات کے سٹاک اور بلڈ کلیکشن سنٹر کا بھی معائنہ کیا۔ انہوں نے مریضوں اور انکے لواحقین سے سہولیات کی بابت پوچھا اور انکی شکایات کے ازالہ کیلئے فوری احکامات جاری کئے۔ اس موقع پر بات چیت کرتے ہوئے ڈپٹی کمشنر صبا اصغر علی نے کہا کہ ڈیوٹی سے کوتاہی کسی صورت برداشت نہ ہو گی اور تمام ڈاکٹروں اور پیرا میڈیکل اسٹاف کیلئے ضروری ہے کہ وہ بروقت ڈیوٹی پر پہنچیں کیونکہ مریض انکے منتظر ہوتے ہیں۔ انہوں نے کہا کہ مریضوں کی سہولت کیلئے ہسپتال میں دستیاب ادویات کی لسٹ اور ڈیوٹی روسٹر نمایاں جگہ پر آویزاں کئے جائیں۔