میرپور پولیس نے عالمی ڈرگ سمگلرز نیٹ ورک ٹریس کر کے مرکزی ملزم سمیت 10افرادکو گرفتارکر لیا

میرپور(اُردو پوائنٹ اخبارتازہ ترین - این این آئی۔ 28 اپریل2025ء) میرپور پولیس نے بین الاقوامی ڈرگ سمگلرز کا نیٹ ورک ٹریس کرتے ہوئے مرکزی ملزم ارشد بلو سمیت 10افرادکو گرفتارکر لیا، مختلف مقدمات میں 4کلو سے زائد ہیروئین برآمد، ڈرگ نیٹ ورک سے منسلک نجی کرنسی ایکس چینج سیل،1کروڑ سے زائد ملکی و غیر ملکی کرنسی اور اسلحہ برآمد، 77سے زائد کھاتہ رجسٹر اور دیگر اہم دستاویزت سمیت ملزمان کے زیر استعمال 5گاڑیاں بھی ضبط کر لی گئیں۔

سوموار کے روز ایس ایس پی میرپور خاور علی شوکت نے پولیس افسران کے ہمراہ ایس ایس پی آفس میں میڈیا بریفینگ دیتے ہوئے بتایا کہ میرپور میں 2015سے راجہ ارشد عرف بلو بین الاقوامی منشیات کانیٹ ورک چلا رہاتھاجوکے پی کے، آزادکشمیر اور اسلام آباد سے ہیروئین پارسل اور دیگر ذرائع سے برطانیہ سمگل کرتے رہے۔

(جاری ہے)

ارشد بلو کے خلاف 2013میں برطانیہ میں ہیروئین سمگلنگ پر مقدمہ درج ہوا جس میں اس کا ساتھی قیصر بھی شامل تھا جسے بعد میں برطانوی عدالت نی7 سال سزا سنائی۔

گرفتاری کے چند ماہ بعد ارشد بلو برطانیہ میں ضمانت پر رہا ہوا اور پھر وہاں سے فرار ہو کر پا کستان آ گیا۔ 2015میں ارشد بلو نے منشیات سمگلنگ کیلئے نیٹ ورک تشکیل دیا جس میں راجہ فیصل، عظیم، ندیم، حسن رووف اور دیگر افراد نے ہیروئین برطانیہ سمگل کرنا شروع کی۔ یہ ملزمان ہیروئین بذریعہ کوریئر برطانیہ سمگل کرنے پر میرپور میں گرفتار رہے اور ان پرمیرپور کے مختلف تھانوں میں متعدد مقدمات درج ہیں۔

ایس ایس پی میرپورخاور علی شوکت نے بتا یا کہ میرپور پولیس نے ستمبر 2024میں اس نیٹ ورک پر کام شروع کیا اور اس نیٹ ورک کے سرغنہ ارشد بلو کے قریبی ساتھیوں پر خفیہ نگرانی شروع کی۔ نومبر2024میں انٹری پوائنٹ دھانگلی ڈڈیال پر ملزمان جنید اور وقار سے چیکنگ کے دوران ہیروئین برآمد ہوئی۔ تفتیش کے دوران ملزمان نے انکشاف کیا کہ وہ ارشد بلو کے بین الاقوامی ڈرگ نیٹ ورک کا حصہ ہیں اوریہ ہیروئین ارشد بلو اوراس کے ساتھی احتشام راجہ ساکن برٹلہ چڑھوئی برطانیہ سمگل کرتے ہیں۔

ملزمان نے بتایا کہ اس سے قبل ارشد بلو اور اظہر عباس کی ہدایت پر متعدد بار ہیروئین کے پی کے اور راولپنڈی اسلام آباد سے سمگل کی اور مختلف جگہوں پرڈیلور کی۔جس کے بعد منظم نیٹ ورک کی نگرانی اور دیگر ملزمان کی گرفتاری کیلئے حساس اداروں کے ساتھ ملکر ٹیمیں تشکیل دی گئیں۔ اسی دوران اپریل 2025میں تھانہ پولیس ڈڈیال نے ملزم عمار ساکن سرساوہ کوٹلی کے قبضے سے ہیروئین برآمد کی جس نے انکشاف کیا کہ یہ ہیروئین ارشد بلو اور احتشام کی ہے جو اس نے اسلام آباد ڈیلور کرنی تھی۔

دوران تفتیش ملزم نے بتایاکہ اس سے قبل بھی وہ احتشام کے ہمراہ اسلام آباد DHLآفس، میرپور اور دیگر مقامات پر ہیروئین ڈیلو ر اور پارسل کرتا رہا ہے۔ پولیس نے راجہ ارشد بلو اور احتشام کی گرفتاری کیلئے آزادکشمیر اور پاکستان کے مختلف علاقوں میں ملزمان کے قائم ٹھکانوں پر چھاپے مارے۔ اس بین الاقوامی ڈرگ نیٹ کے مرکزی ملزم ارشد بلو کو میرپورسے گرفتار کیا گیا۔

ملزم ارشد بلو نے دوران تفتیش بین الاقوامی ڈرگ نیٹ میں ملوث برطانیہ، کے پی کے، راولپنڈی، اسلام آباد اور آزادکشمیر کے مختلف علاقوں سے تعلق رکھنے والے افراد کا انکشاف کیاہے۔ ملزم ارشد بلو نے بتایا کہ وہ 2019سے احتشام راجہ کے ساتھ کام کر رہا ہے اور منشیات برطانیہ سمگل کررہے ہیں ا ور 2024سے اظہر، وقار اور جنید کے ذریعے ہیروئین کے پی کے اور دیگر علاقوں سے منگوا کر برطانیہ سمگل کررہا ہے۔

ڈرگ نیٹ ورک میں خان وحید اور توقیر بھی شامل ہیں جن سے مختلف اوقات میں کروڑوں روپے پاکستانی کرنسی وصول کیں۔ ملزم ارشد بلو کے بنک ریکارڈ کی پڑتال سے معلوم ہوا کہ ایک نجی بنک اکاونٹ میں 6کروڑ سے زائد رقم جمع کروائی گئی۔ تفتیشی ٹیم نے 100سے زائد مشکوک بینک ٹرازیکشنز کے ریکارڈ کے لیے متعلقہ بنک سے رابطہ کرلیا ہے۔ ملزم ارشد بلو کی نشاندہی پر پولیس نے ڈرگ نیٹ ورک کے اہم رکن خان وحید کے ملکیتی نیلم کرنسی پر کاروائی کرتے ہوئے لاکھوں روپے ملکی و غیر ملکی کرنسی برآمد کی جبکہ گھر پر کاروائی کرتے ہوئے ملزم توقیر سے ڈرگ منی25لاکھ روپے اور دیگر ملکی و غیر ملکی کرنسی برآمد کی۔

ملزم توقیر کے قبضے سے اسلحہ رائفل 222بور، رپیٹر پمپ ایکشن 12بور،2عدد 44بور رائفلز، 8mmرائفل، 3عدد 30بور پستول، 22بور پستول، 9mmپستول، 30بور موذر،خنجر، 16میگزینز اور گولیاں، 10موبائل فونز، لیپ ٹیپ، ٹیب اور دیگر سامان اور اہم دستاویزات برآمد کی گئی۔اس کے علاوہ 77سے زائد کھاتہ رجسٹر اور ملزمان کے زیر استعمال 5گاڑیاں بھی ضبط کر لی گئیں۔ کیش ریکارڈ کھاتوں کی پڑتال جاری ہے۔

ضبط شدہ ایک کیش رجسٹر سے معلوم ہوا کہ نیلم کرنسی کے مالک ملزم خان وحید اور ملزم توقیر نے مرکزی ملزم ارشد بلو کو کیش ادائیگیاں کیں جن کا اندراج موجود ہے،ایک رجسٹر پر موجود ریکارڈ کے مطابق ملزم ارشد بلو کو 50لاکھ50ہزار، 25لاکھ، 21لاکھ 30ہزار، 7لاکھ 90ہزار، 5لاکھ پاکستانی روپے کی مختلف اوقات میں ادائیگی کی گئی جبکہ دیگر 77سے زائد کیش ریکارڈ رجسٹرز کی پڑتال جاری ہے۔

ایس ایس پی میرپور خاور علی شوکت نے مزید بتایا کہ ابتدائی تفتیش میں یہ حقائق سامنے آئے ہیں کہ یہ نیٹ ورک برطانیہ، پاکستان اور آزادکشمیر کے علاقوں تک پھیلا ہوا ہے۔ یہ کیس ہائی پروفائل کیس ہے اور اس حوالے سے برطانیہ اور انٹر پول سے رابطے میں ہیں۔پولیس اورحساس ادارے ملکر کام کر رہے ہیں اور دیگر ملزمان کو ٹریس کرکے گرفتار کرنے کیلئے ٹیمیں کام کر رہیں ہیں۔ اس کیس میں ملوث تمام ملزمان کو گرفتار کرتے ہوئے کیفرکردار تک پہنچایا جائے گا۔ میرپور پولیس حکومت آزادکشمیر اور آئی جی آزادکشمیر کے وژن ڈرگ فری اسٹیٹ پر کام کر رہی ہے اور منشیات فروشوں کے خلاف بھرپور کاروائیاں جاری رہیں گی۔