بلیک آئوٹ، سپین، فرانس اور پرتگال تاریکی میں ڈوب گئے

پیرس (اُردو پوائنٹ اخبارتازہ ترین - این این آئی۔ 28 اپریل2025ء)فرانس، اسپین اور پرتگال میں بڑے پیمانے پر ہونے والے بلیک آٹ نے لاکھوں افراد کو بجلی سے محروم کردیا۔غیر ملکی میڈیا کے مطابق سپین اور پرتگال کی حکومتوں نے ہنگامی کابینہ اجلاس طلب کرلئے،ان ممالک کے متعدد علاقوں میں ٹریفک نظام مفلوج ہو نے سے ہائی ویز پر گاڑیوں کی قطاریں لگ گئیں۔

سگنل بند ہونے کی وجہ سے شدید ٹریفک جام رہا جبکہ ہوائی اڈے پر بھی متعدد پروازوں میں تاخیر ہوئی۔پرتگال کے یوٹیلیٹی ادارے آر ای این نے تصدیق کی کہ بجلی بحران پورے آئبیریائی جزیرہ نما آئبیرین پینیسولا اور اور فرانس کے کچھ حصوں میں بھی ہوا۔پرتگالی ادارے آر ای این کے ترجمان نے بتایا کہ بجلی کی سپلائی کی بحالی کے تمام منصوبے فعال کر دیئے گئے ہیں، یورپ کے توانائی پیدا کرنے والے آپریٹرز کے ساتھ مشترکہ طور پر کام کر رہے ہیں۔

(جاری ہے)

سپین کے گرڈ آپریٹر ریڈ الیکٹریکا نے بتایا کہ وہ علاقائی توانائی کمپنیوں کے ساتھ مل کر بجلی بحال کرنے کی کوشش کر رہا ہے۔سپین کے ریڈیو سٹیشنوں کے مطابق میڈرڈ کے انڈر گرائونڈکے کچھ حصوں کو خالی کروایا گیا۔میڈیارپورٹ کے مطابق میڈرڈ کی گلیوں میں سیکڑوں افراد دفتری عمارتوں سے باہر نکل کرآئے تھے جب کہ اہم اور حساس عمارتوں کے گرد پولیس کی بھاری نفری تعینات کی گئی۔

رپورٹ کے مطابق میڈرڈ کی مشہور چار ٹاوروں میں سے ایک کو خالی کرا لیا گیا جہاں برطانوی سفارت خانہ بھی واقع ہے۔ مقامی ریڈیو رپورٹس میں بتایا گیا ہے کہ کئی لوگ رکی ہوئی میٹرو ٹرینوں اور لفٹوں میں پھنس گئے تھے۔پرتگالی پولیس کے مطابق، پورے ملک میں ٹریفک لائٹس بند ہو گئیں، لزبن اور پورٹو میں میٹرو سروس معطل ہو گئی، جبکہ ٹرینوں کی آمدورفت بھی رک گئی۔

پرتگالی ایئرلائن ٹیپ کے ذرائع کے مطابق، لزبن ایئرپورٹ بیک اپ جنریٹرز پر چل رہا ہے۔سپین میں 46ہوائی اڈے چلانے والے ادارے AENAنے ملک بھر میں پروازوں میں تاخیر کی اطلاع دی ہے۔فرانس میں گرڈ آپریٹر آر ای ٹی نے بتایا کہ وہاں بھی عارضی طور پر بجلی کا تعطل ہوا تھا تاہم اب بجلی بحال کر دی گئی ہے۔تاحال ان تینوں ممالک میں ایک ہی وقت ہونے والے بجلی کے پراسرار بریک ڈاون کی وجہ کا تعین نہیں کیا جاسکا تاہم واقعے کی تحقیقات جاری ہیں۔