Live Updates

پہلگام واقعے سے متعلق بیان ، دنیش کنیریا شاہد آفریدی پر تلملا اٹھے

فکسنگ سکینڈل پر تاحیات پابندی کا شکار سابق ٹیسٹ سپنر نے سابق کپتان پر الزامات کی بوچھاڑ کردی

ذیشان مہتاب منگل 29 اپریل 2025 11:27

پہلگام واقعے سے متعلق بیان ، دنیش کنیریا شاہد آفریدی پر تلملا اٹھے

کراچی (اردو پوائنٹ تازہ ترین اخبار ۔ 29 اپریل 2025ء ) پاکستان کے سابق کرکٹر دنیش کنیریا نے ایک بار پھر پاکستان دشمنی کا مظاہرہ کرتے ہوئے شاہد آفریدی پر بے بنیاد الزامات لگا دیے۔

44 سالہ دنیش کنیریا پاکستان میں نام کمانے اور پیسہ بنانے کے بعد اب بیرون ملک منتقل ہوگئے ہیں اور اکثر پاکستان کے خلاف زہر اگلتے رہتے ہیں۔

سابق ٹیسٹ لیگ اسپنرنے سوشل میڈیا پر من گھڑت دعویٰ کرتے ہوئے کہا کہ ’’شاہد آفریدی نے مسلسل انتہاپسندانہ خیالات کو اپنا رکھا ہے، انہوں نے مجھے مذہب تبدیل کرنے پر مجبور کرنے کی کوشش کی تھی اور میرے ساتھ کھانے سے انکار کیا تھا‘‘۔

قبل ازیں شاہد آفریدی نے پہلگام حملے کے حوالے سے سوالات اٹھاتے ہوئے کہا تھا کہ ’’وہاں پر پٹاخہ بھی پھٹ جائے تو پاکستان پر نام لگادیا جاتا ہے، مقبوضہ کشمیر میں 8 لاکھ بھارتی فوج ہونے کے باوجود یہ واقعہ ہوگیا اس کا مطلب تم نالائق اور نکمے ہو جو لوگوں کو سکیورٹی نہیں دے سکے‘‘۔

(جاری ہے)

واضح رہے کہ پہلگام حملے کے بعد بھارتی حکومت نے بوکھلاہٹ میں آکر متعدد پاکستانی یوٹیوب چینلز پر بھی پابندی عائد کر دی ہے جن میں سابق فاسٹ باؤلر شعیب اختر اور سابق کرکٹر باسط علی کا یوٹیوب چینل بھی شامل ہے۔ بھارت نے یہ اقدام اپنے عوام سے سچ چھپانے اور حقائق کو دبانے کے لیے اٹھایا ہے۔