بھارت کی سائبر دہشتگردی، پاکستان کی وفاقی وزارتوں پر سائبر حملے ناکام بنادیئے گئے

سائبر حملوں سے کوئی بڑا مسئلہ نہیں ہوا، ٹیلی کام سیکٹر پر بھی ان کا کوئی اثر نہیں آیا؛ وزیر آئی ٹی شزہ فاطمہ کا بیان

ساجد علی منگل 29 اپریل 2025 12:01

بھارت کی سائبر دہشتگردی، پاکستان کی وفاقی وزارتوں پر سائبر حملے ناکام ..

اسلام آباد ( اُردو پوائنٹ اخبارتازہ ترین۔ 29 اپریل 2025ء ) پاکستان نے بھارت کی جانب سے وفاقی وزارتوں کی ویب سائٹس پر سائبر حملے ناکام بنادیئے۔ تفصیلات کے مطابق اپنے ایک بیان میں وفاقی وزیر برائے انفارمیشن ٹیکنالوجی شزہ فاطمہ خواجہ نے بتایا کہ بھارت کی جانب سے مختلف وفاقی وزارتوں کی ویب سائٹس پر کیے گئے تاہم یہ سائبر حملے پاکستان نے ناکام بنا دیئے ہیں، بھارت کے سائبر حملوں سے کوئی بہت بڑا مسئلہ نہیں ہوا، ٹیلی کام سیکٹر پر سائبر حملوں کا کوئی اثر نہیں آیا کیوں کہ وفاقی وزارتوں کی ویب سائٹس کی ہوسٹنگ این ٹی سی پر ہے اور این ٹی سی کے پاس سائبر سکیورٹی کا بہترین نظام ہے۔

اس حوالے سے ان کا مزید یہ بھی کہنا ہے کہ قومی اور صوبائی سطح پر کمپیوٹر ایمرجنسی رسپانس ٹیمز تشکیل دی جاچکی ہیں، وفاقی اور صوبائی حکومتیں سائبر سیکیورٹی کے حوالے سے شہریوں کو بھی آگاہی دے رہی ہیں، اس مقصد کے لیے کمپیوٹر ایمرجنسی رسپانس ٹیمز کی جانب سے ایڈوائزریاں جاری کی جارہی ہیں، اس کے علاوہ سائبر حملوں سے متعلق این ٹی آئی ایس بی بھی فعال ہے، پاکستان سائبر سیکورٹی کے لحاظ سے ٹاپ ممالک کی فہرست میں شامل ہے۔

(جاری ہے)

شزہ فاطمہ نے بتایا کہ گزشتہ دو سالوں میں پاکستان سائبر سیکورٹی کے لحاظ سے ٹاپ ٹیئر ممالک میں آیا ہے اور پاکستان کا نام امریکا، برطانیہ اور ان جیسے ممالک کی فہرست میں آیا ہے، سوشل میڈیا پر ہونے والی جنگ پر پاکستانی نوجوانوں کو داد دیتی ہوں، پاکستانی میمز بنا کر پاک بھارت کشیدگی کو انجوائے کر رہے ہیں، لوگ سوشل میڈیا پر اتنی کشیدہ صورتحال کو بھی اپنے انداز میں بیان کررہے ہیں، ہم پاکستانی کسی ڈرنے والے نہیں ہیں، پاکستان نے ہمیشہ امن کی بات کی، پاکستان نے پہلگام واقعے کی مذمت کی ہے کیوں کہ پاکستان خود دہشت گردی سے متاثر ہے۔