ڈپٹی کمشنر حیدرآباد کی زیر صدارت وہیل چیئر کی تقسیم کے حوالے سے تقریب کا انعقاد

منگل 29 اپریل 2025 23:37

حیدرآباد (اُردو پوائنٹ اخبارتازہ ترین - اے پی پی۔ 29 اپریل2025ء) ڈپٹی کمشنر حیدرآباد زین العابدین میمن کی زیر صدارت وہیل چیئر کی تقسیم کے حوالے سے تقریب کا انعقاد ہوا۔ دائود گلوبل فاؤنڈیشن نے آئل اینڈ گیس ڈویلپمنٹ کمپنی لمیٹڈ (OGDCL) کے تعاون سے پیپلز پرائمری ہیلتھ کیئر انیشی ایٹو (PPHI) سندھ کے تحت کام کرنے والے ہسپتالوں میں 350 وہیل چیئرز تقسیم کی گئیں۔

اس موقع پر اظہار خیال کرتے ہوئے ڈپٹی کمشنر زین العابدین میمن نے کہا کہ یہ شاندار اقدام اس بات کی واضح مثال ہے کہ پبلک،پرائیویٹ پارٹنرشپ کے ذریعے شہریوں کی زندگیوں میں مثبت تبدیلی لائی جا سکتی ہے۔ انہوں نے کہا کہ ہم داؤد گلوبل فاؤنڈیشن اور او جی ڈی سی ایل کے شکر گزار ہیں جنہوں نے یہ قیمتی عطیہ دیا۔ یہ وہیل چیئرز مختلف اضلاع کے مریضوں کو بہت فائدہ پہنچائیں گی اور سب کے لیے بہتر دیکھ بھال اور سہولتوں کو یقینی بنائیں گی۔

(جاری ہے)

تقریب کو بریفنگ دیتے ہوئے دائود گلوبل فائونڈيشن کے کوآرڈینٹر میران شاہ نے بتایا کہ اس اقدام کے تحت حیدرآباد، ٹنڈو الہٰیار، سانگھڑ، ٹنڈو محمد خان، بدین، جامشورو اور سجاول کے اضلاع میں فی ضلع 50 وہیل چیئرز فراہم کی گئی ہیں۔ اس اقدام سے مریضوں کی نقل و حرکت میں بہتری اور ان کی آرام دہ دیکھ بھال ممکن ہو سکے گی۔ تقریب میں ریجنل کوآرڈینیٹر OGDCL حیدرآباد زاہد علی مہيسر، نیشنل کوآرڈینیٹر داؤد گلوبل فاؤنڈیشن میران علی شاہ، اور مختلف اضلاع کے پی پی ایچ آئی کے نمائندگان شامل تھے۔