ماہانہ فیول چارجز ایڈجسٹمنٹ کی مد میں بجلی سستی ہونے کا امکان

منفی فیول چارجز ایڈجسٹمنٹ سے صارفین کو 25کروڑ روپے کا ریلیف ملے گا، سی پی پی اے

منگل 29 اپریل 2025 20:40

اسلام آباد (اُردو پوائنٹ اخبارتازہ ترین - این این آئی۔ 29 اپریل2025ء)ما ہانہ فیول چارجز ایڈجسٹمنٹ کی مد میں بجلی تین پیسے سستی ہونے کا امکان ہے، ڈسکوز کی درخواست پر نیپرا میں سماعت ہوئی۔ دوران سماعت کیس آفیسر نے بتایا کہ مارچ میں 8ارب 40کروڑ 90 لاکھ یونٹس بجلی پیدا کی گئی ہے، ڈسکوز کے مطابق مارچ میں بجلی کی لاگت 9.22 روپے فی یونٹ تھی، مارچ کے لئے بجلی کی ریفرنس لاگت 9.25روپے فی یونٹ تھی۔

سی پی پی اے نے بتایا کہ منفی ایڈجسٹمنٹ سے صارفین کو 25کروڑ روپے کا ریلیف ملے گا، مارچ میں انرجی مکس میں صرف ایک ہی جگہ پر معمولی تبدیلی ہے، مارچ میں ریفرنس کی بہ نسبت ہائیڈور سے پیداوار 3فیصد کم رہی۔ این ٹی ڈی سی حکام نے کہا کہ مارچ میں بجلی کی مجموعی پیداوار ریفرنس کے مقابلے 8 فیصد کم ہوئی، پچھلے سال کے مارچ کی بہ نسبت بجلی کی پیداوار میں 4.6 فیصد کمی ریکارڈ ، مارچ میں بجلی کی زیادہ سے زیادہ 16673میگاواٹ ریکارڈ کی گئی۔

(جاری ہے)

این ٹی ڈی سی حکام نے بتایا کہ گزشتہ سال مارچ میں زیادہ سے زیادہ پیداوار 15ہزار 164میگاواٹ تھی، مارچ کے دوران بجلی کی کم سے کم سے کم پیداوار 6106 میگاواٹ رہی، پچھلے سال مارچ میں کم سے کم پیداوار 7094میگاواٹ تھی، نیلم جہلم کی وجہ سے پیداوار میں فرق کا ابھی تک تعین نہیں کیا، سسٹم رکاوٹوں کے باعث 62کروڑ 20لاکھ روپے کا نقصان ہوا۔ بعدازاں سماعت مکمل ہوگئی۔

نیپرا نے کہا کہ اتھارٹی نے تمام متعلقہ اسٹیک ہولڈرز کی آرا کو تسلی سے سنا ہے، اتھارٹی ڈیٹا کی مزید جانچ پڑتال کے بعد اپنا تفصیلی فیصلہ جاری کرے گی۔نیپرا نے کہا کہ سی پی پی اے جی نے ایف سی اے کی مد میں 3 پیسے فی یونٹ کمی کی درخواست جمع کروائی تھی، سی پی پی اے جی کی جانب سے مسلسل 9ماہ سے ایف سی اے کی مد میں کمی کی درخواست کی گئی، اس کمی کا اطلاق ڈسکوز کے تمام صارفین ماسوائے لائف لائن، پروٹیکٹڈ صارفین، پری پیڈ صارفین اور الیکٹرک وہیکل چارجنگ اسٹیشنز پر ہوگا اس کا اطلاق کے الیکٹرک صارفین پر بھی نہیں ہو گا۔