ق*صارفین کی شکایات کے فوری ازالے کے لئے لیسکو ہیڈ کوارٹر میں ای کچہری کا انعقاد

منگل 29 اپریل 2025 21:05

لاہور (اُردو پوائنٹ اخبارتازہ ترین - آن لائن۔ 29 اپریل2025ء) چیئرمین بورڈ آف ڈائریکٹر عامر ضیا اور چیف ایگزیکٹو لیسکو انجینئر محمد رمضان بٹ کی ہدایت پر جی ایم آپریشن اعجاز بھٹی کی زیر قیادت لیسکو ہیڈ کوارٹر میں ای کچہری کا انعقاد کیا گیا، ای کچہری میں فیس بک کے لائیو سیشن کے ذریعے صارفین کی شکایات سٴْنی گئیں اور شکایات کے فی الفور ازالے کے لئے موقع پر ہی احکامات جاری کئے گئے۔

اس موقع پر جی ایم آپریشنز اعجاز بھٹی کے علاوہ ایچ آر ڈائریکٹر ضمیر حسین کلاچی، ڈی جی ایمپیمنٹیشن رائے محمد اصغر، ڈی جی ایڈمن معصومہ عادل، منیجر کمپلینٹ سیل نعمان ملہی اورمنیجر کمرشل رانا رضوان صبغت اللہ موجود تھے جبکہ تمام سرکلز کے ایس ایز نے بھی فیس بک لنک کے ذریعے ای کچہری میں شرکت کی۔

(جاری ہے)

ای کچہری میں تمام سرکلز کے صارفین نے شرکت کی اور اپنے اپنے مسائل بیان کیے، جس پر جی ایم آپریشنز اعجاز بھٹی نے متعلقہ افسران کو فی الفور ہدایات جاری کئیں اور حکم دیا کہ تمام شکایات 24 گھنٹے کے اندر اندر حل کی جائیں۔

ان کا کہنا تھا کہ اس بات کو یقینی بنا یا جائے کہ صارفین کو ان کی ریڈنگ کے مطابق بل جاری ہوں اور صارفین کی شکایات کے ازالے کو مکمل طور پر یقینی بنایا جائے۔ انہوں نے صارفین سے بھی درخواست کی کہ بجلی کی بلا تعطل سپلائی کو یقینی بنانے کے لئے اپنے بجلی بلوں کی بروقت ادائیگی کریں۔ واضح رہے کہ ہر ماہ لیسکو چیف اپنی ٹیم کے ہمراہ فیس بک پیج LESCO PMDU کے ذریعے عوام کی شکایات وصول کرتے ہیں جن کے فی الفور ازالے کو ہر ممکن طور پر یقینی بنایا جاتا ہے۔