ڈپٹی کمشنر استامحمد ارشد حسین جمالی کامختلف برف کے کارخانوں کا دورہ

منگل 29 اپریل 2025 21:30

کوئٹہ (اُردو پوائنٹ اخبارتازہ ترین - اے پی پی۔ 29 اپریل2025ء) ڈپٹی کمشنر استامحمد ارشد حسین جمالی نے گرمی کی شدت میں اضافہ کے پیش نظر مختلف برف کے کارخانوں کا دورہ کیا،انہوں نے برف کی تیاری کے عمل، کارخانوں میں پانی کی دستیابی اور کارخانوں کی مجموعی صورت حال کا جائزہ لیا ۔ ڈپٹی کمشنر نے برف کارخانہ مالکان کو ہدایت جاری کی کہ شہریوں کو موسم گرما میں برف کی کمی کا سامنا نہ ہو۔

(جاری ہے)

انہوں نے واضح کیا کہ ضروریات کے مطابق برف کی مسلسل پیداوار کو یقینی بنایا جائے اور کسی صورت میں برف کی قیمت میں اضافہ نہ کیا جائے۔ انہوں نے مزید کہا کہ انتظامیہ عوام کی سہولت کے لیے ہر ممکن اقدامات کر رہی ہے اور گرانفروشی یا ذخیرہ اندوزی ہرگز برداشت نہیں کی جائے گی ، بحیثیت مسلمان ہم سب کو چاہیے کہ ہم اپنے مسلمان بھائیوں کی مدد کریں اور ان کی مشکلات میں کمی کا سبب بنیں نہ کہ ان کی مشکلات میں اضافہ کا باعث بنیں۔