یمن ، چھ صوبوں میں حوثیوں کے اہداف پر امریکی فضائیہ کے 49 حملے

ْ شدید حملے حوثیوں کی جانب سے ضلع الغیل سے ایک میزائل فائر کیے جانے کے بعد کیے گئے، ذرائع

بدھ 30 اپریل 2025 17:10

واشنگٹن(اُردو پوائنٹ اخبارتازہ ترین - این این آئی۔ 30 اپریل2025ء)واشنگٹن کی جانب سے حوثیوں کے خلاف جاری فضائی مہم کے 46 ویں روز، امریکی طیاروں نے یمن کے چھ مختلف صوبوں میں میزائل لانچنگ پلیٹ فارموں، اسلحہ گوداموں اور فوجی ٹھکانوں پر 49 فضائی حملے کیے۔حوثی میڈیا نے تصدیق کی کہ دار الحکومت صنعا کو کئی فضائی حملوں کا سامنا کرنا پڑا، تاہم تعداد واضح نہیں کی گئی۔

امریکی فضائیہ نے صنعا کے مضافات میں کئی حوثی ٹھکانوں پر شدید حملے کیے۔ حوثی ذرائع کے مطابق، صنعا کے مغربی ضلع بنی مطر میں کئی مقامات پر حملے کیے گئے، جب کہ شمال میں ہمدان ضلع میں ایک عسکری کیمپ کو نشانہ بنایا گیا۔ضلع بنی حشیش کے علاقے صرف میں ایک ایسی جگہ پر حملہ کیا گیا جہاں شبہ تھا کہ حوثی قیادت چھپی ہوئی ہے۔

(جاری ہے)

اس کے علاوہ دار الحید کے علاقے میں ایک خفیہ میزائل لانچنگ سائٹ اور عسکری ساز و سامان پر حملہ کیا گیا۔

صوبہ الجوف میں امریکی جنگی طیاروں نے 24 فضائی حملے کیے، جن میں سے 6 ضلع برط العنان میں اسلحہ کے خفیہ گوداموں پر کیے گئے، جب کہ رات دیر گئے، 18 حملوں کے ساتھ سب سے شدید بم باری کی گئی، جو میزائل لانچنگ مقامات اور دیگر عسکری اہداف پر مرکوز تھی۔ذرائع کے مطابق، یہ شدید حملے حوثیوں کی جانب سے ضلع الغیل سے ایک میزائل فائر کیے جانے کے بعد کیے گئے، جو بحیرہ احمر کی سمت داغا گیا تھا۔صنعا کے شمال میں واقع ضلع ارحب میں ایک دفاعی میزائل ایک کھیت میں گر کر پھٹ گیا، جس سے متعدد گھروں کو نقصان پہنچا اور مقامی آبادی میں خوف و ہراس پھیل گیا۔ عسکری ذرائع کے مطابق، یہ میزائل حوثی ملیشیا نے بنی حشیش میں ایک فوجی کیمپ سے ایک امریکی طیارے کو نشانہ بنانے کے لیے داغا تھا۔