ڈپٹی کمشنر اوراسسٹنٹ کمشنر کھاریاں احمد شیر گوندل کے ہمراہ تحصیل ہیڈکوارٹر ہسپتال (THQ) کھاریاں کا تفصیلی دورہ

بدھ 30 اپریل 2025 18:47

کھاریاں(اُردو پوائنٹ اخبارتازہ ترین - این این آئی۔ 30 اپریل2025ء)ڈپٹی کمشنر اوراسسٹنٹ کمشنر کھاریاں احمد شیر گوندل کے ہمراہ تحصیل ہیڈکوارٹر ہسپتال (THQ) کھاریاں کا تفصیلی دورہ کیا۔ انہوں نے ہسپتال میں مریضوں کو فراہم کی جانے والی طبی سہولیات، صفائی کے انتظامات، ادویات کی دستیابی، سٹاف کی حاضری اور ایمرجنسی سروسز کا جائزہ لیا۔ڈپٹی کمشنر نے او پی ڈی، ایمرجنسی، لیبارٹری،وارڈز اور دیگر شعبہ جات کا دورہ کیا اور مریضوں اور ان کے لواحقین سے بات چیت کرتے ہوئے ان کی رائے سنی۔

بعض مریضوں نے خدمات کو تسلی بخش قرار دیا جبکہ بعض نے معمولی شکایات کا اظہار بھی کیا، جس پر فوری ازالے کی ہدایات جاری کی گئیں۔انہوں نے ہسپتال میں صفائی ستھرائی، سینیٹیشن، اور سٹاف کی موجودگی کا ریکارڈ بھی چیک کیا۔

(جاری ہے)

ڈپٹی کمشنر نے سی ای او ہیلتھ اور ہسپتال انتظامیہ کو ہدایت کی کہ ہسپتال میں آنے والے ہر مریض کو بروقت اور معیاری طبی سہولیات فراہم کی جائیں، اور ہسپتال کی کارکردگی کو مزید بہتر بنانے کے لیے تمام وسائل بروئے کار لائے جائیں۔ڈپٹی کمشنر نے کہا کہ عوام کو صحت کی بنیادی سہولیات کی فراہمی حکومت پنجاب کی اولین ترجیح ہے، اور ضلعی انتظامیہ اس سلسلے میں ہر ممکن اقدامات کر رہی ہے تاکہ عام شہریوں کو ان کی دہلیز پر معیاری صحت کی سہولتیں میسر آئیں۔