Live Updates

پاک بھارت کشیدگی، پاکستانی ہائی کمشنر نے کینیڈین حکام کو حقائق سے آگاہ کردیا

بدھ 30 اپریل 2025 19:45

ٹورنٹو (اُردو پوائنٹ اخبارتازہ ترین - این این آئی۔ 30 اپریل2025ء)کینیڈا میں پاکستان کے ہائی کمشنر محمد سلیم نے کینیڈین حکام کو پاکستان اور بھارت کے درمیان تناؤ سے متعلق اصل صورتِ حال سے آگاہ کردیا۔ ہائی کمشنر نے گلوبل افیئرز کینیڈا کے حکام سے ملاقات کی اور پاکستان کا مؤقف پیش کیا۔ ہائی کمشنر محمد سلیم نے بتایا کہ بھارت نے مقبوضہ کشمیر میں ہونے والے واقعہ کے حوالے سے پاکستان پر بیبنیاد الزامات عائد کیے ہیں۔

(جاری ہے)

انہوں نے بتایا کہ پاکستان نے اقوامِ متحدہ اور اپنے دوست ممالک سے بات کی اور پیشکش کی کہ پہلگام واقعے کی آزاد تحقیقات کروائی جائیں، پاکستان مکمل تعاون کرے گا۔ ہائی کمشنر محمد سلیم کے مطابق بھارت نے ہمیشہ بے بنیاد الزامات عائد کیے اور دھمکی آمیز رویہ اپنائے رکھا۔انہوں نے کہا کہ پاکستان محفوظ ہاتھوں میں ہے اور ہمیشہ محفوظ رہے گا۔ انہوںنے کہاکہ پاکستان کے تعلقات کینیڈا کے ساتھ بہت اچھے ہیں اور یہاں حالیہ الیکشن کے نتیجہ میں بننے والی لبرل پارٹی کی حکومت کے ساتھ تعلقات مزید مستحکم ہوں گے۔ ہائی کمشنر محمد سلیم نے کینیڈین الیکشن میں کامیاب ہونے والے 6 پاکستانی نڑاد امیدواروں کو مبارکباد بھی دی ہے۔