Live Updates

وفاقی وزیر برائے سمندرپار پاکستانیز و ترقی انسانی وسائل چوہدری سالک حسین کا یوم مزدور کے موقع پر پیغام

بدھ 30 اپریل 2025 22:10

اسلام آباد (اُردو پوائنٹ اخبارتازہ ترین - اے پی پی۔ 30 اپریل2025ء) وفاقی وزیر برائے سمندرپار پاکستانیزو ترقی انسانی وسائل چوہدری سالک حسین نے کہا ہے کہ یکم مئی مضبوط اور خوشحال پاکستان کی تعمیر میں ہماری لیبر فورس کے انمول اور بے مثال کردار کی تجدید عہد کا دن ہے۔وزارت سمندر پار پاکستانیز و ترقی انسانی وسائل سے جاری بیان کے مطابق مزدوروں کے عالمی دن کے موقع پر وفاقی وزیر چوہدری سالک حسین نے کہا کہ آج جب ہم یوم مزدور 2025 منا رہے ہیں، میں پاکستان کے ان محنتی اور انتہائی جفا کش مرد وخواتین کا تہہ دل سے شکر گزار ہوں اور دل کی گہرائیوں سے احترام کرتا ہوں جو ہماری ملکی معیشت میں ریڑھ کی ہڈی کی حیثیت رکھتے ہیں ،ہمارے کارکنان خواہ کارخانوں میں ہوں، کھیتوں ، دفاتر یا تعمیراتی جگہوں پر ہوں غیر متزلزل عزم و استقلال، لگن اور دیانتداری کے ساتھ مصروف عمل ہیں ،ان کی مخلصانہ کوششیں پر عزم ، پائیدار اور پر امید پاکستان کے جذبے کا ثبوت ہیں ۔

(جاری ہے)

انہوں نے کہا کہ ہم اپنے مزدوروں کی قربانیوں اور کامیابیوں کو خراج تحسین پیش کرتے ہیں، یہ ہمارا فرض ہے کہ ہم ان کے وقار، حقوق اور فلاح و بہبود کو یقینی بنانے کے لئے اپنے بھر پور عزم کا اعادہ کریں،حکومت مزدوروں اور محنت کشوں کےلئے منصفانہ اجرت ، کام کے حالات کو بہتر بنانے،ہنر مندی اور ان کی استعداد کار میں اضافے کے لئے پر عزم اورثابت قدم ہے،آئیے ہم مل کر اتحاد و یگانگت کے ساتھ ایک ایسے مستقبل کی طرف بڑھیں جہاں ہر کارکن کی قدر اور عزت ہو اس کا مستقبل محفوظ اور خوشیوں سے بھر پور اور بااختیار ہو،اللہ ہماری قوم اور ہمارے کارکنوں کو امن، خوشحالی اور ترقی عطا فرمائے۔