اٹلی میں انسانی سمگلرز کے خلاف کارروائیوں کے دوران 3 پاکستانی شہری گرفتار

ملزمان نے نے 14 جون 2023ء کو یونان کے ساحلی شہر پیلوس کے قریب پیش آنے والے ایک دلخراش حادثے کا شکار افراد کو غیر قانونی امیگریشن کی سہولت فراہم کی تھی

ساجد علی جمعرات 1 مئی 2025 12:29

روم ( اُردو پوائنٹ اخبارتازہ ترین۔ 01 مئی 2025ء ) اٹلی میں انسانی سمگلرز کے خلاف کارروائیوں کے دوران 3 پاکستانی شہریوں کو گرفتار کرلیا گیا۔ میڈیا رپورٹس کے مطابق اٹلی میں انسانی سمگلنگ میں ملوث افراد کے خلاف کارروائیوں کے دوران ملک کے مختلف شہروں تورین، کتانزارو اور بریسیا سے انسانی سمگلنگ کے الزام میں 3 پاکستانی شہریوں کو گرفتار کیا گیا ہے، ذرائع کا کہنا ہے کہ یہ کارروائیاں پاکستانی عدالتی حکام کی درخواست پر عمل میں لائی گئی ہیں، جن میں بین الاقوامی پولیس اور اٹلی کی ریاستی پولیس نے مشترکہ طور پر حصہ لیا۔

گرفتار افراد پر الزام ہے کہ انہوں نے 14 جون 2023ء کو یونان کے ساحلی شہر پیلوس کے قریب پیش آنے والے ایک دلخراش حادثے میں غیر قانونی امیگریشن کی سہولت فراہم کی، جس میں سینکڑوں پاکستانی تارکین وطن جاں بحق ہو گئے تھے، حادثے کے بعد تحقیقات کے دوران سامنے آنے والے شواہد کی روشنی میں ان تینوں پاکستانیوں کو سمندر کے راستے غیر قانونی سفر کی سازش میں ملوث قرار دیا گیا۔

(جاری ہے)

پولیس ذرائع کی جانب سے بتایا گیا ہے کہ ان تینوں افراد کے خلاف پاکستانی عدالتوں کی جانب سے جاری کیے گئے وارنٹ کی بنیاد پر ان کی گرفتاری عمل میں لائی گئی، مقامی پراسیکیوٹر جنرل کے تعاون اور متعلقہ اپیل عدالتوں کی توثیق کے بعد ان کی باقاعدہ حراست عمل میں لائی گئی، کیس میں مزید تین پاکستانی شہریوں کی تلاش جاری ہے جو اب بھی مفرور ہیں، پولیس نے اس حوالے سے بین الاقوامی سطح پر رابطے تیز کر دیئے ہیں تاکہ ان مطلوب افراد کو بھی جلد گرفتار کیا جا سکے۔