Live Updates

محنت کشوں کی محنت، پاکستان کی ترقی کا انجن ہے،حنیف عباسی

جمعرات 1 مئی 2025 21:55

راولپنڈی(اُردو پوائنٹ اخبارتازہ ترین - این این آئی۔ 01 مئی2025ء) وفاقی وزیر ریلوے نے کہا ہے کہ محنت کشوں کی محنت، پاکستان کی ترقی کا انجن ہے۔جاری بیان کے مطابق وزیر ریلوے محمد حنیف عباسی نے راولپنڈی میں ریلوے ورکرز یونین کے اراکین سے ملاقات کی۔ اس موقع پر وزیر ریلوے نے ان کی محنت اور پاکستان ریلوے کی کامیابی میں ان کے اہم کردار کو سراہا۔

وزیر نے کہا کہ محنت کشوں کی محنت پاکستان کی ترقی کا انجن ہے ۔وزیر ریلوے نے کہا کہ تمام محنت کش ہمارے ملک کے عظیم اثاثہ ہیں، مزدور کی جدوجہد نے ملک کے معاشی ڈھانچے کو مضبوط کیا ہے۔ محنت کش ہماری ترقی کی بنیاد ہیں۔حنیف عباسی نے اس بات پر زور دیا کہ پاکستان ریلوے کی کامیابی میں محنت کش کا کردار ناقابلِ فراموش ہے۔ انہوں نے کہا کہ میں بھی ایک محنت کش ہوں جو ملک و قوم کی فلاح کے لیے دن رات اپنی محنت میں مصروف ہوں۔

(جاری ہے)

وزیر نے محنت کشوں کی تنخواہوں کے حوالے سے کہا کہ محنت کشوں کو ان کی محنت کا عادلانہ معاوضہ ملنا چاہئے اور وہ جب تک کام کر رہے ہیں ان کی محنت کا حق انہیں فوراً ملنا چاہئے۔ انہوں نے کہا کہ محنت کش پاکستان کی ترقی کا راستہ روشن کرتے ہیں اور ان کی محنت کو ہمیشہ قدر کی نگاہ سے دیکھا جائے گا۔وزیر ریلوے نے محنت کشوں کو حکومت کی جانب سے مکمل حمایت کا یقین دلایا اور کہا کہ ہم اپنے محنت کشوں کے حقوق کے تحفظ اور ان کے بہتر مستقبل کے لیے پرعزم ہیں۔وزیر ریلوے نے اپنے پیغام میں کہا کہ ‘‘پاکستان کی ترقی کا انجن، محنت کشوں کا عزم ہی!’’ اور آخر میں انہوں نے محنت کشوں کے حق میں ایک نعرہ لگایامزدور زندہ باد، پاکستان پائِندہ باد، پاکستان ریلوے شاد باد!۔