من پسند بھرتیوں کی وجہ سے اس حالت کو پہنچے ہیں،نرم مزاجی دکھا لی، اب سختی کی جائیگی‘حنیف عباسی

جمعہ 2 مئی 2025 13:07

لاہور(اُردو پوائنٹ اخبارتازہ ترین - این این آئی۔ 02 مئی2025ء)وفاقی وزیر ریلوے محمد حنیف عباسی نے لاہور ریلوے اسٹیشن کا اچانک دورہ کیا اورصفائی ستھرائی کے ناقص انتظامات پر اظہار برہمی کرتے ہوئے ڈویژنل میڈیکل افسر صائمہ ممتاز کو معطل کر دیا ،وفاقی وزیر نے اسٹیشن پر ملازمین کی غیر حاضری کا بھی نوٹس لیا اور اسٹیشن ماسٹر لاہور کی سرزنش کی ۔

(جاری ہے)

وزیر ریلوے حنیف عباسی کی جانب سے پنجاب فوڈ اتھارٹی کو چھاپے مارنے کی بھی اجازت دی ، اب فوڈ اتھارٹی ریلوے اسٹیشنوں پر بغیر اجازت کھانے کا معیار چیک کر سکیں گی۔ حنیف عباسی اسٹیشن سے پیدل واشنگ لائن پہنچ گئے اور ملازمین کی کم تعداد کا نوٹس لیتے ہوئے ریلوے کے گھروں سے تمام ملازمین فوری واپس بلانے کی ہدایت کی ۔ حنیف عباسی نے کہا کہ ریلوے میں من پسند بھرتیوں کی وجہ سے آج اس حالت کو پہنچے ہیں،نرم مزاجی دکھا لی، اب سختی کی جائے گی۔ وزیر ریلوے حنیف عباسی نے کہا کہ بد عنوانی کے کیسز ایف آئی اے کو بھجوائے جائیں گے۔وفاقی وزیر حنیف عباسی نے مزار بی بی پاک دامن پر بھی حاضری دی اور چادر چڑھائی۔