گلشن حدید لنک روڈ پر تیز رفتار بس الٹنے سے خواتین سمیت 4 افراد جاں بحق، 25 زخمی

جاں بحق ہونے والے افراد مختلف علاقوں کے رہائشی تھے جو حیدرآباد سے کراچی آ رہے تھے

جمعہ 2 مئی 2025 15:32

کراچی(اُردو پوائنٹ اخبارتازہ ترین - این این آئی۔ 02 مئی2025ء)گلشن حدید لنک روڈ پر حیدرآباد سے کراچی آنے والی تیز رفتار بس ڈرائیور سے بے قابو ہو کر الٹ گئی جس کے نتیجے میں دو خواتین سمیت 4 افراد جاں بحق اور 25 مسافر زخمی ہوگئے۔تفصیلات کے مطابق اسٹیل ٹاون کے علاقے گلشن حدید لنک روڈ کے قریب حیدرآباد سے کراچی آنے والی تیز رفتار مسافر بس ڈرائیور سے بے قابو ہو کر الٹ گئی جس کے بارعث بس میں سوار متعدد مسافر زخمی ہوگئے۔

(جاری ہے)

اطلاع ملنے پر علاقہ مکین، پولیس اور ریسکیو کی ٹیمیں موقع پر پہنچ گئیں، چھیپا اور ایدھی کے رضاکاروں نے پولیس اور علاقہ مکینوں کی مدد سے زخمیوں کو ایمبولینسوں کے ذریعے جناح اور نجی اسپتال منتقل کیا۔پولیس کے مطابق حادثے میں دو خواتین اور دو مرد جاں بحق اور 25 مسافر زخمی ہوئے، جاں بحق ہونے والوں کی شناخت 35 سالہ کوثر زوجہ سعید، 60 سالہ پنا زوجہ محمد علی، 59 سالہ عبدالغفور ولد محمد اسماعیل اور 25 سالہ غلام فرید ولد یاسین کے ناموں سے کی گئی، جاں بحق ہونے والے افراد مختلف علاقوں کے رہائشی تھے جو حیدرآباد سے کراچی ا ٓرہے تھے۔پولیس حکام کے مطابق ورثا کے آنے کے بعد لاشیں قانونی کارروائی کے بعد ان کے حوالے کر دی جائیں گی۔