Live Updates

اسلام آباد یونائیٹڈ کا ٹاس جیت کر بیٹنگ کا فیصلہ غلط تھا، مگر کیوں

ایسی صورتحال میں جب بارش ہوئی ہو تو باؤنسی پچ پر پہلے بیٹنگ کرنا میرے لیے حیران کن تھا ،باسط علی

ہفتہ 3 مئی 2025 12:31

لاہور(اُردو پوائنٹ اخبارتازہ ترین - این این آئی۔ 03 مئی2025ء) قذافی اسٹیڈیم لاہور میں کھیلے گئے پی ایس ایل 10 کے اہم میچ میں اسلام آباد یونائیٹڈ نے ٹاس جیت کر پہلے بیٹنگ کا فیصلہ کیا جو اس کیلئے نقصان کا باعث بنا۔اسلام آباد یونائیٹڈ مقررہ 20 اوورز میں 9 وکٹوں کے نقصان پر صرف 143 رنز بنا سکی اور اس کے کھلاڑی ریت کی دیوار کی مانند یکے بعد دیگرے پویلین لوٹتے چلے گئے اور ٹیم پشاور زلمی کے ہاتھوں 6وکٹوں سے ہار گئی۔

سابق کرکٹر اور تجزیہ نگار باسط علی نے اسلام آباد یونائیٹڈ کی حالیہ شکست پر تبصرہ کرتے ہوئے ٹیم کی ناکامی کی اصل وجوہات بیان کیں۔باسط علی کے مطابق ٹیم کے کپتان نے ٹاس جیت کر بیٹنگ کرنے کا جو فیصلہ کیا وہ ان کی شکست کا باعث بنا کیونکہ گزشتہ رات ہی لاہور میں طوفانی بارش ہوئی تھی۔

(جاری ہے)

ان کا کہنا تھا کہ ایسی صورتحال میں جب بارش ہوئی ہو تو باؤنسی پچ پر پہلے بیٹنگ کرنا میرے لیے حیران کن تھا اگر اس جگہ میں ہوتا تو کبھی ٹاس جیت کر پہلے بیٹنگ نہیں کرتا۔

اس موقع پر کامران اکمل کا کہنا تھا کہ یہ بات سب جانتے ہیں کہ یہ رات کا میچ تھا اور سارا دن مطلع ابر آلود رہا اس لیے پچ کو دھوپ نہیں لگی اس میں نمی برقرار تھی۔ اس کے علاوہ اسلام آباد یونائیٹڈ نے اپنے اہم کھلاڑیوں کو اس میچ میں شامل نہیں کیا، میر ے خیال میں شکست کی وجہ یہ بھی ہوسکتی ہے۔لاہور کے قذافی اسٹیڈیم میں گزشتہ رات کھیلے گئے میچ میں پشاور زلمی نے اسلام آباد یونائیٹڈ کی جانب سے دیا جانے والا 145 رنز کا ہدف 17ویں اوور میں 4 وکٹوں کے نقصان پر باآسانی حاصل کرلیا۔اسلام آباد یونائیٹڈ کے صاحبزادہ فرحان 36 رنز بناکر آؤٹ ہوئے جبکہ بین ڈی وارشز 33 رنز کے ساتھ نمایاں رہے۔