آزادی صحافت جمہوریت کی روح ہے،میئر کراچی بیرسٹر مرتضیٰ وہاب

ہفتہ 3 مئی 2025 17:17

کراچی(اُردو پوائنٹ اخبارتازہ ترین - این این آئی۔ 03 مئی2025ء)میئر کراچی بیرسٹر مرتضیٰ وہاب نے عالمی یومِ آزادی صحافت کے موقع پر صحافی برادری کو خراجِ تحسین پیش کرتے ہوئے کہا ہے کہ یہ دن دنیا بھر میں صحافیوں کی قربانیوں، ان کی انتھک جدوجہد اور آزادی اظہار رائے کے تحفظ کے لیے منایا جاتا ہے۔ ان کا کہنا تھا کہ ایک آزاد اور غیر جانبدار صحافت کسی بھی جمہوری معاشرے کی بنیاد ہوتی ہے، جو عوام کو حقائق تک رسائی فراہم کرتی ہے اور سماج کو باخبر رکھنے میں کلیدی کردار ادا کرتی ہے۔

میئر کراچی بیرسٹر مرتضیٰ وہاب نے کہا کہ عالمی یومِ آزادی صحافت ہمیں یہ یاد دلاتا ہے کہ سچ بولنے کی قیمت اکثر بھاری ہوتی ہے، لیکن خاموشی اس سے کہیں زیادہ نقصان دہ ہو سکتی ہے۔ آزادی صحافت پر قدغنیں دراصل جمہوریت کا گلا گھونٹنے کے مترادف ہیں۔

(جاری ہے)

ایسے میں صحافیوں کو آزاد، محفوظ اور دباؤ سے پاک ماحول فراہم کرنا ریاست کی اولین ذمہ داری ہونی چاہیے۔

میئر کراچی نے کہا کہ صحافت صرف خبر رسانی نہیں بلکہ معاشرتی شعور، انصاف، شفافیت اور عوامی آواز کو بلند کرنے کا ذریعہ ہے۔ صحافی ظلم و جبر کے خلاف قلم اٹھاتے ہیں، حقائق کو بے نقاب کرتے ہیں اور مظلوموں کی آواز بنتے ہیں۔ ان کی قربانیاں تاریخ کا روشن باب ہیں، جنہیں کبھی فراموش نہیں کیا جا سکتا۔ انہوں نے کہا کہ ہمیں ان تمام صحافیوں کو خراجِ عقیدت پیش کرنا چاہیے جنہوں نے سچ کی راہ میں اپنی جانیں قربان کیں۔

میڈیا کی آزادی کا تحفظ دراصل انسانی حقوق کے تحفظ کی ضمانت ہے اور ایک باشعور قوم ہمیشہ آزاد اور ذمہ دار صحافت کا ساتھ دیتی ہے۔ میئر کراچی نے نوجوان نسل پر بھی زور دیا کہ وہ جھوٹی خبروں، افواہوں اور پراپیگنڈے سے بچنے کے لیے مستند اور آزاد ذرائع پر انحصار کریں اور حق و سچ کے علمبردار بنیں۔ ان کا کہنا تھا کہ آج کا دن اس عہد کی تجدید کا دن ہے کہ ہم آزادی صحافت کے تحفظ اور فروغ کے لیے اپنی بھرپور کوششیں جاری رکھیں گے۔ انہوں نے کہا کہ آزادی صحافت صرف صحافیوں کی نہیں، بلکہ ہر فرد کی آزادی ہے، اور اس کا دفاع ہم سب کی مشترکہنذمہندارینہے۔