Live Updates

حکومت کا کرارا جواب، بھارت کے تجارتی جہازوں کی پاکستانی بندرگاہوں آمد پر پابندی عائد

وزارت بحری امور کے فیصلے کے مطابق پاکستانی جہاز بھی بھارتی بندرگاہوں کا رخ نہیں کریں گے

اتوار 4 مئی 2025 14:35

اسلام آباد (اُردو پوائنٹ اخبارتازہ ترین - این این آئی۔ 04 مئی2025ء) حکومت پاکستان نے بھارتی پابندی کا منہ توڑ جواب دیتے ہوئے بھارتی جہازوں پاکستان کی تمام بندرگاہوں پر آمد پر پابندی عائد کردی، وزارت بحری امور کے فیصلے کے مطابق پاکستانی جہاز بھی بھارتی بندرگاہوں کا رخ نہیں کریں گے۔

(جاری ہے)

میڈیا رپورٹ کے مطابق وفاقی وزارت بحری امور نے پاکستانی بندرگاہوں پر بھارتی پرچم بردار جہازوں کی آمد پر پابندی عائد کی ہے، موجود صورتحال کے پیش نظر بھارتی فلیگ کیریئرز کو پاکستانی حدود میں داخلے کی اجازت نہیں ہوگی، کسی بھی معاملے پر استثنیٰ کا فیصلہ کیس ٹو کیس کی بنیاد پر کیا جائے گا۔

اس سے قبل بھارت نے پاکستان سے براہِ راست اور بالواسطہ ہر طرح کی درآمدات پر پابندی لگادی تھی، دہلی سرکار نے فیصلہ کیا تھا کہ پاکستان سیکوئی خط اور پارسل تک وصول نہیں کیا جائے گا۔بھارتی وزارت تجارت کے نوٹیفکیشن کے مطابق پاکستان سے کسی بھی طرح کے سامان کی براہِ راست یا کسی اور ملک کے راستے امپورٹ کرنے پر پابندی ہوگی۔بھارتی وزارت تجارت کے حکم نامے میں کہا گیا تھا کہ پاکستان سے کسی ضروری سامان کی درآمد کا استثنیٰ بھارتی حکومت کی اجازت سے مشروط ہوگا۔