کرک ، طوفانی بارش اور ژالہ باری نے تباہی مچادی

برساتی نالہ میں اچانک طغیانی آنے سے 2 افراد بہہ کرزندگی سے ہاتھ دھوبیٹھے درجنوں مویشی ہلاک ،ضلع اورکزئی میں آسمانی بجلی گرنے سے پانچ مویشی مرگئے

اتوار 4 مئی 2025 19:05

کوہاٹ(اُردو پوائنٹ اخبارتازہ ترین - این این آئی۔ 04 مئی2025ء)کرک میں طوفانی بارش اور ژالہ باری نے تباہی مچادی جہاں برساتی نالہ میں اچانک طغیانی آنے سے 2 افراد بہہ کرزندگی سے ہاتھ دھوبیٹھے جبکہ درجنوں مویشی بھی ہلاک ہوگئے جبکہ قبائلی ضلع اورکزئی میں آسمانی بجلی گرنے سے پانچ مویشی مرگئے ۔اتوار کے روز کوہاٹ دویژن کے کئی علاقوں بشمول کوہاٹ‘ کرک ‘ اورکزئی اور ہنگو میں کہیں ہلکی اور کہیں موسلادھار بارش ہوئی جبکہ بعض مقامات پر ژالہ باری ہونے کی بھی اطلاعات ملی ہیں۔

شدید بارش کے نتیجے میں کئی ندی نالوں میں طغیانی آگئی اور برساتی نالے بپھر گئے۔ اطلاعات کے مطابق کرک کے نواحی علاقے ورغہ بانڈہ اور ملاگی کے درمیان واقع ترخہ نامی برساتی نالے میں شدید طٖغیانی کے نتیجے میں وہاں کام کرنے والے دو افراد سیلابی ریلے میں بہہ گئے ۔

(جاری ہے)

اطلاع ملتے ہی ریسکیو 1122 کی ٹیم نے پہنچ کر تلاش شروع کردی اور ایک شخص کی لاش برآمد کرلی جبکہ دوسرے کی تلاش کا کام جاری تھا۔

سیلابی میں بہہ کر جاں بحق افرادکی فوری طورپر شناخت نہیں ہوسکی۔عینی شاہدین کے مطابق سیلابی ریلے کی زدمیں آکرچھوٹے بڑے درجنوں مویشی بھی سیلابی ریلے میں بہہ کر ہلاک ہوگئے ۔شدید بارش اور ژالہ باری کے نتیجے میں کھڑی فصلوں اور باغات کو خاصا نقصان پہنچا۔ادھر قبائلی ضلع اورکزئی کی اپر تحصیل کے علاقہ پٹی گڑھی میں ایک گھر پر آسمانی بجلی گرنے سے پانچ مویشی کے ہلاک ہونے کی اطلاعات ملی ہیں۔