Live Updates

بلوچستان امن جرگے کی کوششوں سے ملاخیل خلجی اور کاکڑ قبائل کے درمیان 15سال بعد قتل کے تنازعے کا پرامن تصفیہ کردیا گیا

اتوار 4 مئی 2025 20:05

کوئٹہ(اُردو پوائنٹ اخبارتازہ ترین - این این آئی۔ 04 مئی2025ء)بلوچستان امن جرگے کی کوششوں سے ملاخیل خلجی اور کاکڑ قبائل کے درمیان 15سال بعد قتل کے تنازعے کا پرامن تصفیہ کردیا گیا۔اتوار کو بلوچستان امن جرگے کے سربراہ لالہ یوسف خلجی ،سردار یحییٰ خان ناصر ،ملک اجمل کاکڑ، ملک حسن ،حاجی حسن جان شمسوزئی ، مفتی غلام حیدراوردیگرقبائلی معتبرین ، علماء کرام کی قیادت میں جرگہ کوئٹہ کے علاقے بھوسہ منڈی کے قریب ملاخیل خلجی قبائل کے پاس گیا جہاں ملاخیل خلجی قبائل کے معتبرین حاجی عمران خان ملاخیل ،حاجی موسیٰ خان سلیمان خیل،حاجی محمد رمضان ملاخیل ، سابق رکن صوبائی اسمبلی نصراللہ زیرے، حافظ وکیل ، عباس درانی ، پروفیسر مولانا عابداوردیگر معتبرین نے جرگے کو خوش آمدید کہا۔

جرگے کے شرکاء نے اپنی غلطی کو تسلیم کیاجس کے بعد ملاخیل خلجی قبائل کے معتبرین نے جرگے کو عزت بخشتے ہوئے خون معاف کرنے کااعلان کیا جس کے بعد دونوں قبائل کو شیروشکر کردیا گیا۔

(جاری ہے)

اس موقع پر جرگے کے شرکاء سے خطاب کرتے ہوئے بلوچستان امن جرگے کے سربراہ لالہ یوسف خلجی ، حاجی عمران خان ملاخیل ،سردار یحییٰ خان ناصر، ملک اجمل خان کاکڑ،مفتی غلام حیدر ،حاجی موسیٰ خان سلیمانخیل ، حاجی محمدرمضان ملاخیل ، سابق رکن صوبائی اسمبلی نصراللہ زیرے ، عباس درانی ، حافظ وکیل ، پروفیسر مولانا عابد ،ماسٹر حاجی نادر اوردیگر نے خطاب کرتے ہوئے کہا کہ ملاخیل خلجی قبائل اور کاکڑ قبائل کے درمیان 15سال سے قتل کا تنازعہ چلا رہا تھا عدالتوں میںمقدمے کا فیصلہ نہیں ہواجس کے بعد بلوچستان امن جرگے اورقبائلی معتبرین نے دونوں قبائل سے رابطہ کرکے فریقین سے اختیارحاصل کیا جس کے بعد قتل کے تنازعے کا پرامن تصفیہ کرکے دونوں قبائل کو شیر وشکر کردیا گیا جو ایک خوش آئند بات ہے۔

انہوں نے کہاکہ ملاخیل خلجی قبائل کی جانب سے خون معاف کرنے پر ہم انکا شکریہ اد اکرتے ہیں ،اللہ تعالیٰ نے بھی معاف کرنے والے کو پسند کیا ہے۔انہوں نے کہا کہ بلوچستان میں صدیوں سے پشتون ،بلوچ اوردیگر قبائل اپنے تنازعات ،قبائلی دشمنیوں کا جرگے اور میڑھ کے ذریعے پرامن تصفیہ کرتے آرہے ہیں۔ انہوں نے کہا کہ ہمیں چاہئے کہ سیاست سے بالاتر ہوکر قبائلی دشمنیوں کے خاتمے کیلئے اپنا کردارادا کریں ۔

لالہ یوسف خلجی نے کہا کہ بلوچستان امن جرگہ طویل عرصے سے صوبے میں قبائلی دشمنیوں اورتنازعات کے خاتمے کیلئے کام کرتا آرہا ہے ابتک درجنوں قبائلی دشمنیوں اورتنازعات کا پرامن تصفیہ کرکے قبائل کوشیروشکر کردیا گیا ہے آج کا جرگہ بھی اسی سلسلے کی ایک کڑی ہے انہوںنے یقین دلایا کہ بلوچستان امن جرگہ آئندہ بھی قبائلی تنازعات اوردشمنیوں کے خاتمے کیلئے اپنا کردارادا کرتا رہے گا۔