صدر آئی آئی اے کا اسلام آباد انڈسٹریل زون کے قیام کیلئے زمین کا مطالبہ

اسلام آباد (اُردو پوائنٹ اخبارتازہ ترین - اے پی پی۔ 04 مئی2025ء) اسلام آباد انڈسٹریل ایسوسی ایشن (آئی آئی اے) کے صدر عبدالرزاق شیخ نے کہا ہے کہ اسلام آباد انڈسٹریل زون کے لیے زمین کی فراہمی اسلام آباد کے صنعتکاروں کا دیرینہ مطالبہ ہےجس پر عمل درآمد ضروری ہے۔اتوار کو آئی آئی اےکے صدر عبدالرزاق شیخ نے اے پی پی کو بتایا کہ اسلام آباد انڈسٹریل ایسوسی ایشن کی قیادت جلد ہی وزیر اعظم محمد شہباز شریف سے ملاقات کرے گی اور ان کے سامنے اسلام آباد انڈسٹریل زون سمیت دیگر مطالبات پیش کرے گی اور ہماری قیادت نے مختلف مقامات پر اسلام آباد انڈسٹریل زون کے لیے موزوں اراضی کی نشان دہی کی ہے۔

صدر آئی آئی اے نے کہا کہ اس وقت اسلام آباد میں تین مختلف زونز میں صنعتی علاقے ہیں جن میں سیکٹرز I-10 ، I-9 اور کہوٹہ ٹرائنگولر شامل ہیں، جنہیں مربوط کرنے کی ضرورت ہے اور اسلام آباد انڈسٹریل زون کی بنیاد ایک جگہ پر رکھی جائے۔

(جاری ہے)

انہوں نے کہا کہ اسلام آباد انڈسٹریل زون کے قیام سے اسلام آباد کے تاجروں اور صنعت کاروں کو ملکی صنعت اور معاش میں بھرپور حصہ ڈالنے کا موقع ملے گا۔

انہوں نے کہا کہ اسلام آباد کا صنعتی زون خطے میں خاص طور پر وسطی ایشیا کی ریاستوں اور اس سے آگے یوریشین ممالک کے ساتھ تجارت میں اہم کردار ادا کرے گا۔اس کے ساتھ ساتھ اسلام آباد کے صنعتی زون افغانستان اور دیگر جنوبی ایشیائی ممالک کے ساتھ تجارتی تعلقات میں اپنا بھرپور کردار ادا کر سکتے ہیں۔انہوں نے کہا کہ پاکستان کو اب غیر روایتی منڈیوں کے ساتھ افریقہ، جنوبی اور شمالی امریکہ کی منڈیوں کے ساتھ اپنے تجارتی بہاؤ کو بڑھانا ہو گا۔

صدر آئی آئی اے نے کہا کہ کیپٹل ڈویلپمنٹ اتھارٹی (سی ڈی اے) کو اسلام آباد کے صنعتی زونز میں سکیورٹی اور کاروبار کرنے میں آسانی کو فروغ دینے کے لیے کاروباری برادری کے ساتھ مل کر کام کرنا چاہیے۔سینئر صنعتکار رہنما نے کہا کہ نرسریوں اور ڈرائی پورٹ کو اسلام آباد کے صنعتی علاقوں سے دوسری جگہوں پر منتقل کیا جائے تاکہ تاجر برادری آسانی سے یہاں آ سکے۔

انہوں نے کہا کہ صنعت کاری نوجوانوں کو ملازمتوں میں جذب کرنے کا بہترین آپشن ہے اور بہت سے سرمایہ کار اسلام آباد کے علاقے میں صنعتیں لگانے کے خواہشمند تھے لیکن نئے صنعتی زون کی عدم موجودگی کی وجہ سے وہ نئی سرمایہ کاری کرنے سے قاصر ہیں۔انہوں نے کہا کہ حکومت کو اس اہم منصوبے کی جلد تکمیل میں آئی آئی اے کے ساتھ تعاون کرنا چاہیے جس سے معیشت کے لیے متعدد فوائد حاصل ہوں گے۔

ایک سوال کے جواب میں انہوں نے کہا کہ اسلام آباد کے صنعتکار آئندہ بجٹ 2025-26 میں حکومت سے ریلیف کے خواہاں ہیں ، حکومت کو ملک میں کاروبار کرنے میں آسانی کو فروغ دینے کے لیے اقدامات کرنے چاہئیں۔انہوں نے کہا کہ ویتنام اور بنگلہ دیش جیسی علاقائی معیشتوں سے مقابلہ کرنے کے لیے ہمیں مقامی صنعتی شعبے میں پیداواری صلاحیت اور مسابقت کی ضرورت ہے۔