شی پاور پروگرام بلوچستان کی بچیوں کیلئے ایک اہم اور انقلابی قدم ہے، صوبائی مشیر مینا بلوچ

کوئٹہ (اُردو پوائنٹ اخبارتازہ ترین - اے پی پی۔ 05 مئی2025ء) صوبائی مشیر برائے کھیل و امورِ نوجوانان مینا مجید بلوچ نے ''شی پاور'' پروگرام کو بلوچستان کی بچیوں کے لیے ایک اہم اور انقلابی قدم قرار دیتے ہوئے کہا ہے کہ یہ منصوبہ نہ صرف ان کی صحت اور صفائی کے معیار کو بہتر بنائے گا، بلکہ انہیں تعلیم، آگاہی اور خود اعتمادی کی راہ پر بھی گامزن کرے گا۔

یہ بات انہوں نے ''شی پاور'' کی اختتامی تقریب سے بطور مہمانِ خصوصی خطاب کرتے ہوئے کہی۔انہوں نے کہا کہ بلوچستان کے دیہی اور پسماندہ علاقوں میں رہنے والی بچیاں اکثر بنیادی سہولیات سے محروم ہوتی ہیں اور یہ منصوبہ خاص طور پر ایسے ہی طبقے کو براہِ راست فائدہ پہنچائے گا۔ ان کا کہنا تھا کہ اس پروگرام کے تحت صحت و صفائی کی کٹس کی فراہمی، آگاہی مہمات اور تعلیمی مواقع میں بہتری جیسے اقدامات سے نہ صرف بچیوں کی زندگیوں میں بہتری آئے گی بلکہ وہ بااختیار ہو کر معاشرے میں مثبت تبدیلی لانے کے قابل بھی بنیں گی۔

(جاری ہے)

صوبائی مشیر کھیل و امور نوجوانان مینا مجید بلوچ نے کہا کہ ''شی پاور'' صرف ایک صحت کا منصوبہ نہیں بلکہ یہ بلوچستان کی بیٹیوں کے خوابوں کو حقیقت میں بدلنے کا ایک ذریعہ ہے۔ انہوں نے اس امید کا اظہار کیا کہ پاکستان کا برادر ملک چین بلوچستان میں تعلیم، انفارمیشن ٹیکنالوجی، فنی اور تکنیکی علوم کے فروغ کے لیے بھی بچیوں اور بچوں کو عصری علوم سے آراستہ کرنے میں معاونت کرے گا۔

انہوں نے کہا کہ وزیرِ اعلیٰ بلوچستان میر سرفراز بگٹی صنفی مساوات کی اعلیٰ مثال ہیں۔ وہ نہ صرف بچیوں کے لیے خصوصی اسکالرشپس کا اجراء کر رہے ہیں بلکہ خواتین کے لیے ملازمتوں میں مختص کوٹہ پر بھی عملدرآمد کو یقینی بنا رہے ہیں۔ اس کے علاوہ، صوبہ کی تاریخ میں پہلی بار کوئٹہ میں محکمہ ترقی نسواں کا ورکنگ ویمن ہاسٹل اور دیگر سہولیات کی فراہمی بھی انہی کی قیادت میں ممکن ہوئی ہے۔

اس موقع پر آرگنائزرز نے شرکاء کو منصوبے کی تفصیلات سے آگاہ کرتے ہوئے بتایا کہ ''شی پاور'' منصوبہ چینی حکومت کی معاونت اور بلوچستان کے محکمہ تعلیم کے تعاون سے چین-پاکستان اقتصادی راہداری کے تحت حکومتِ بلوچستان نے شروع کیا ہے۔ اس منصوبے کا مقصد خواتین کو حفظانِ صحت اور ہیلتھ اینڈ ہائجین سے متعلق معلومات و سہولیات فراہم کرنا ہے جو انہیں صحت مند اور باوقار زندگی گزارنے میں مدد فراہم کریں گی۔ مقررین نے کہا کہ یہ منصوبہ بلوچستان کی خواتین و بچیوں کے لیے ایک ایسا عملی قدم ہے جو نہ صرف ان کی موجودہ حالت میں بہتری لائے گا بلکہ انہیں ایک روشن اور باوقار مستقبل کی جانب لے جائے گا۔