مانسہرہ پولیس کے ضلع بھر میں سرچ اینڈ سٹرائیک آپریشنز، بڑی مقدار میں غیر قانونی اسلحہ برآمد

پیر 5 مئی 2025 16:29

مانسہرہ (اُردو پوائنٹ اخبارتازہ ترین - اے پی پی۔ 05 مئی2025ء) ڈی پی او مانسہرہ شفیع اللہ گنڈا پور کے احکامات کی روشنی میں ضلع کے تمام تھانوں کی حدود میں سکیورٹی کو مزید موثر بنانے کے لیے وسیع پیمانے پر سرچ اینڈ سٹرائیک آپریشنز کا انعقاد کیا جس کے دوران بڑی مقدار میں غیر قانونی اسلحہ برآمد کیا۔

(جاری ہے)

مانسہرہ پولیس کے مطابق ضلع بھر میں امن و امان کی فضاء کو برقرار رکھنے کے مقصد سے کئے جانے والے ان آپریشنز کی نگرانی ایس پیز نے کی جبکہ ایس ڈی پی اوز اور ایس ایچ اوز نے لیڈیز پولیس اور دیگر پولیس نفری کے ہمراہ اپنے اپنے علاقے میں ہونے والے ان آپریشنز میں بھرپور حصہ لیا۔

سرچ آپریشنز کے دوران بڑی مقدار میں غیر قانونی اسلحہ برآمد کیا گیا جبکہ متعدد مشتبہ افراد کو تفتیش کے لئے تھانوں میں طلب کیا گیا۔ اس کے ساتھ ساتھ غیر قانونی طور پر رہائش پذیر کرایہ داروں کے خلاف بھی سخت قانونی کارروائیاں کی گئیں۔ ڈی پی او مانسہرہ شفیع اللہ گنڈا پور کا کہنا تھا کہ ان آپریشنز کا مقصد شہریوں کو ایک محفوظ اور پرامن ماحول فراہم کرنا ہے، پولیس فورس اپنی تمام تر صلاحیتوں کے ساتھ اس مشن پر عمل پیرا ہے۔