غزہ پر زمینی حملے کے اسرائیلی منصوبے پر یو این چیف کو تشویش

اسلام آباد (اُردو پوائنٹ ۔ UN اردو۔ 06 مئی 2025ء) اقوام متحدہ کے سیکرٹری جنرل انتونیو گوتیرش نے اسرائیل کی جانب سے غزہ میں اپنی عسکری کارروائیوں کو وسعت اور علاقے میں فوج کی تعیناتی کو طول دینے کے منصوبوں سے متعلق اطلاعات پر تشویش کا اظہار کیا ہے۔

اقوام متحدہ کے نائب ترجمان فرحان حق کے مطابق، سیکرٹری جنرل نے کہا ہے کہ ایسے اقدامات کے نتیجے میں بے شمار شہری ہلاک ہوں گے اور غزہ میں مزید تباہی پھیلے گی۔

سیکرٹری جنرل نے یہ انتباہ ایسے موقع پر جاری کیا ہے جب مقبوضہ فلسطینی علاقوں میں اقوام متحدہ اور اس کے امدادی شراکت داروں نے اسرائیل کی جانب سے غزہ میں امداد کی فراہمی کا نظام اپنے پاس رکھنے کے منصوبے کو مسترد کیا ہے۔

(جاری ہے)

ترجمان کے مطابق، سیکرٹری جنرل نے غزہ میں فوری اور مستقل جنگ بندی اور یرغمالیوں کی بلاتاخیر اور غیرمشروط رہائی کے مطالبے کو بھی دہرایا ہے۔

تباہ کن حملے اور لوٹ مار

غزہ بھر میں فضائی حملے بھی جاری ہیں جہاں اسرائیل نے دو ماہ سے زیادہ عرصہ سے ہر طرح کی امداد روک رکھی ہے۔

امدادی امور کے لیے اقوام متحدہ کے رابطہ دفتر (اوچا) نے بتایا ہے کہ غزہ میں لوٹ مار کے واقعات معمول بن گئے ہیں جن میں دکانوں کے علاوہ اقوام متحدہ کے گوداموں پر بھی حملے ہو رہے ہیں۔ بالخصوص، غزہ شہر میں ایسے واقعات عام ہیں۔

پانی اور ایندھن کی قلت

ادارے نے کہا ہے کہ ایندھن ختم ہونے کے باعث گزشتہ ہفتے شمالی غزہ میں پانی کی فراہمی اور نکاسی آب کے نظام بند ہو گئے تھے جنہیں ابھی تک بحال نہیں کیا جا سکا۔ اسرائیل سے آنے والی پانی کی ایک بڑی پائپ لائن کو چند روز قبل نقصان پہنچنے سے غزہ سٹی سمیت شمالی غزہ میں پانی کی فراہمی متاثر ہوئی جسے اسرائیل کے حکام کو اطلاع دینے اور ان کی اجازت حاصل کرنے کے بعد گزشتہ روز ہی مرمت کیا جا سکا۔

گزشتہ روز اسرائیلی حکام کی جانب سے سہولت فراہم کیے جانے پر اقوام متحدہ کی ایک ٹیم غزہ سٹی سے کچھ ایندھن حاصل کرنے میں کامیاب رہی تاہم علاقے میں ایندھن کے بیشتر ذخائر ناقابل رسائی ہیں کیونکہ اس کے لیے اجازت نہیں دی جا رہی۔ دوسری جانب، رفح میں 18 اپریل کے بعد ایندھن کے حصول کے لیے دی جانے والی تمام درخواستوں کو مسترد کر دیا گیا ہے۔

'اوچا' نے بتایا ہے کہ 3 مئی کے بعد غزہ میں 27 طے شدہ امدادی کارروائیوں میں سے 19 کے لیے اجازت نہیں مل سکی۔ دیگر کارروائیوں کے لیے ابتداً اجازت دے دی گئی تھی لیکن بعد میں اسرائیلی فوج نے ان میں کئی طرح کی رکاوٹیں کھڑی کیں۔