گوالیمار سوسائٹی اور کراچی یونیورسٹی ایمپلائز سوسائٹی کی درمیانی سڑک ڈکیتوں کے لیے جنت بن گئی

سچل کے علاقے اسکیم 33 میں اسٹریٹ کرائمز کی وارداتوں میں اضافے سے شہری شدید پریشانی میں مبتلا

منگل 6 مئی 2025 14:58

کراچی(اُردو پوائنٹ اخبارتازہ ترین - این این آئی۔ 06 مئی2025ء)سچل کے علاقے اسکیم 33 میں اسٹریٹ کرائمز کی وارداتوں میں اضافے سے شہری شدید پریشانی میں مبتلا ہو گئے ہیں۔تفصیلات کے مطابق گوالیمار سوسائٹی اور کراچی یونیورسٹی ایمپلائز سوسائٹی کی درمیانی سڑک ڈکیتوں کے لیے جنت بن گئی ہے، سڑک پر اسٹریٹ کرائمز کی وجہ سے شہریوں کے لیے سفر کرنا محال ہو گیا ہے۔

(جاری ہے)

لٹیرے مذکورہ سڑک پر سیکنڈوں میں شہریوں کے جیبوں کا صفایا کرتے ہیں اور سپر ہائی وے کی جانب فرار ہو جاتے ہیں، مذکورہ سڑک پر موٹر سائیکل سوار شہری سے لوٹ کی واردات کی سی سی ٹی وی فوٹیج بھی سامنے آ گئی ہے۔فوٹیج میں موٹر سائیکل سوار 2 ڈکیتوں کو شہری کا تعاقب اور لوٹ مار کر کے فرار ہوتے دیکھا جا سکتا ہے، اسٹریٹ کرائمز کی وارداتوں کا علم ہونے کے باوجود سچل پولیس نے خاموشی اختیار کی ہوئی ہے اور شہریوں کو ڈکیتوں کے رحم و کرم پر چھوڑا ہوا ہے۔اسکیم 33کے شہریوں نے اعلی پولیس حکام سے اسٹریٹ کرمنلز سے نجات دلانے کا مطالبہ کیا ہے۔