افغان غیور ملت کو درپیش سنگین مسائل و مشکلات، ملک اور خطے کی موجودہ سیاسی اور بحرانی صورتحال کا تفصیلی جائزہ لیا

منگل 6 مئی 2025 21:55

iکوئٹہ (اُردو پوائنٹ اخبارتازہ ترین - آن لائن۔ 06 مئی2025ء)پشتونخوا نیشنل عوامی پارٹی کی مرکزی ایگزیکٹیو کونسل کا اجلاس پارٹی چیئرمین خوشحال خان کاکڑ اور شریک چیئرمین مختار خان یوسفزئی کے زیر صدارت اسلام آباد میں منعقد ہوا جس میں سینئر ڈپٹی چیئرمین رضا محمد رضا، ڈپٹی چیئرمین حامد خان، سیکریٹری جنرل خورشید کاکاجی، سینئر سیکریٹری عبدالقادر آغا، سیکرٹری اطلاعات محمد عیسی روشان، سیکرٹری مالیات یوسف خان کاکڑ اور کونسل کے دیگر اراکین نے شرکت کیں۔

اجلاس میں پشتون افغان وطن کی مجموعی سیاسی صورتحال، پشتونخوا وطن کے عوام اور افغان غیور ملت کو درپیش سنگین مسائل و مشکلات، ملک اور خطے کی موجودہ سیاسی اور بحرانی صورتحال کا تفصیلی جائزہ لیا گیا اور پارٹی کے تنظیمی امور اور آئندہ کے لائحہ عمل کے حوالے سے اہم فیصلے کیے گئے۔

(جاری ہے)

اجلاس میں 20 مئی کو کوئٹہ میں منعقد ہونے والے پارٹی کے اعلی ترین ادارہ مرکزی کونسل (قومی جرگہ) کا اجلاس پشتون افغان قومی سیاسی تحریک کے عظیم رہنما محترم عبدالرحیم خان مندوخیل کی یاد میں ان کی آٹھویں برسی سے منسوب کرتے ہوئے کہا گیا ہے کہ قومی کونسل کے پہلے سیشن میں محترم عبدالرحیم خان مندوخیل کو ان کے تاریخی رول عظیم قربانیوں اور عظیم قومی خدمات پر زبردست خراج عقیدت پیش کیا جائیگا اور پشتونخوانیپ کے سرباز کارکن بابائے افغان کے متعین کردہ قومی اہداف کے حصول اور قومی ارمانوں کی تکمیل کے عزم کا اعادہ کرینگے۔

قومی کونسل میں آئینی ترامیم اور اہم سیاسی وتنظیمی فیصلے منظوری اور توثیق کیلئے پیش ہونگے۔ کونسل کے اراکین کو بروقت اور بھرپور شرکت کی تلقین کی گئی ہے۔