سرینگر میں خانہ بدوش خاتون کے ساتھی جنسی زیادتی کے بعد ہلاکت پرلوگوں کا شدید غم و غصہ

منگل 6 مئی 2025 22:10

سرینگر (اُردو پوائنٹ اخبارتازہ ترین - اے پی پی۔ 06 مئی2025ء) غیرقانونی طورپر بھارت کے زیر قبضہ جموں وکشمیر کے شہر سرینگر کے علاقے نشاط میں راجوری کی ایک خانہ بدوش خاتون کے ساتھ جنسی زیادتی اور ہلاکت کے بعد لوگوں میں شدید غم و غصہ پایا جاتا ہے۔

(جاری ہے)

کشمیرمیڈیاسروس کے مطابق بکروال خاندان سے تعلق رکھنے والی خاتون پر مبینہ طور پر نشے میں دھت افراد کے ایک گروپ نے واٹر ورکس روڈ کے قریب حملہ کیا جب وہ اتوار کی شام اپنے مویشی چرا رہی تھی۔

بعد ازاں وہ ہسپتال لے جاتے ہوئے راستے میں زخموں کی تاب نہ لاتے ہوئے دم توڑ گئی۔پولیس نے اس معاملے میں چار افراد کو گرفتار کر کے ایف آئی آر درج کر لی ہے۔ عدالت نے ملزمان کو چھ دن کی پولیس تحویل میں دے دیا ہے۔واقعہ کے خلاف سرینگر کے علاقوں برین اور نشاط میں بازار بند رہے اور مقامی لوگوں نے احتجاجی مظاہرہ کیا۔ مظاہرین نے بتایاکہ ہم انصاف اور قصورواروں کو سخت سزا دینے کا مطالبہ کرتے ہیں۔