Live Updates

وفاقی وزیر صحت کا ہنگامی صورت حال کے پیش نظر فوری اقدامات کا اعلان، قطر اور جنیوا کے دورے منسوخ، وفاقی ادارہ صحت میں ایمرجنسی کوئیک ریسپانس سینٹر قائم

بدھ 7 مئی 2025 17:19

اسلام آباد (اُردو پوائنٹ اخبارتازہ ترین - اے پی پی۔ 07 مئی2025ء) وفاقی وزیر صحت مصطفیٰ کمال نے موجودہ ہنگامی صورت حال کے پیش نظر فوری اقدامات کا اعلان کرتے ہوئے جنیوا اور قطر کے اپنے طے شدہ سرکاری دورے فوری طور پر منسوخ کر دیئے ہیں اور کہا ہے کہ اسلام آباد کے سرکاری ہسپتالوں میں ایمرجنسی نافذ اور تمام طبی عملے کو مکمل الرٹ رہنے کی ہدایت کی گئی ہے۔

وفاقی وزارت صحت اور اس کے ماتحت اداروں کے تمام ڈاکٹرز، نرسز، پیرا میڈیکل اسٹاف اور انتظامی عملے کی چھٹیاں فوری طور پر منسوخ کر دی گئی ہیں۔ تمام ملازمین کو اپنے عہدوں پر فوری حاضر ہونے کی ہدایت کی گئی ہے ۔انھوں نے کہا کہ اس وقت میری اولین ترجیح ملک کی اندرونی صورتحال پر توجہ مرکوز کرنا اور عوام کی صحت کے تحفظ کو یقینی بنانا ہے۔

(جاری ہے)

وفاقی ادارہ صحت میں ایک *24/7 ایمرجنسی کوئیک ریسپانس سینٹر* قائم کیا گیا ہے، جو جنگ اور اس سے متعلقہ طبی ہنگامی حالات کا فوری جائزہ لے گا اور ردعمل کو مربوط کرے گا۔

یہ سینٹر تمام صوبائی و ضلعی محکمہ صحت کے حکام کے ساتھ براہ راست رابطے میں رہے گا۔ تمام صوبائی حکومتوں کے صحت کے سیکرٹریز کو مرکزی وزارت صحت کے ساتھ مستقل رابطے میں رہنے کی ہدایت کی گئی ہے۔ صوبائی حکام کو وقتاً فوقتاً جاری ہونے والی ہدایات کی روشنی میں اپنے ایمرجنسی پلانز کو اپ ڈیٹ کرنے کا پابند بنایا گیا ہے۔\932