پنجاب پروانشل کو آپریٹوبینک لمیٹڈہڑپہ نے ایک کروڑ 65 لاکھ بوگس گولڈ کیس میں منیجر سمیت تین ملزمان گرفتار کرلئے

جمعرات 8 مئی 2025 19:25

ساہیوال(اُردو پوائنٹ اخبارتازہ ترین - این این آئی۔ 08 مئی2025ء)پولیس ہڑپہ نے پنجاب پروانشل کو اپریٹوبنک لمیٹڈ ایک کروڑ 65لاکھ 50ہزار روپے جعلی سوناکیس میں تین آفیسروں منیجر امانت علی، آپریشن منیجرنعمان اکرم اور ظفر اقبال گارڈ کو گرفتارکرلیا جبکہ ایڈیشنل سیشن جج ساہیوال بشیراحمد نے تین ملزموں کیشئر فریال ممتاز، اشر مجید اور قمر شہزادی کی عبوری ضمانت قبل از گرفتار ی 22مئی تک منظورکرلی ہے اور پولیس ہڑپہ سے مقدمہ کار یکارڈ طلب کرلیاہے۔

تفصیلات کے مطابق پنجاب پروانشل کو اپریٹوبنک لمیٹڈ ہڑپہ اسٹیشن برانچ میں لوگوں نے سونا رکھ کر قرضہ لیا ہوا تھا۔ ایک صارف ساجدبشیر فتیانہ موضع دادفتیانہ نے گولڈرہن رکھ کر قرضہ لیا ہوا تھا جب صارف نے 5لاکھ 66ہزار 96روپے قرضہ کی ادائیگی کے بعد اپنا (سونا)کے زیورات مانگے تو بنک ملازمین نے ٹال مٹول شروع کردی۔

(جاری ہے)

جب ایک اعلی افسر نے زیورات کی تھیلی سے زیورات نکالے توبنک کے زرگر نے ہی بناوٹی زیورات قراردے دیے ۔

جس پر لاہور سے ایک ٹیم نے موقع پر پہنچ کر انکوائری کی تو بوگس دستاویزات سے زیورات کی تھیلیوں میں 6دسمبر 2024یکم نومبر 2024کے کھاتہ جات میں 533گرام گولڈ زیورات جعلی پائے گئے جس پر منیجر امانت علی ، نعمان اکرم اے سی آر او، فریال ممتاز کیشئر، ظفراقبال ساجد گارڈ، آشرمجیدپرائیوٹ گارڈ ، قمرشہزادی میسینجر اور جاوید اقبال بنک زرگراس فراڈ اور جعلسازی کے مرتکب پائے گئے۔

جو خود ہی جعلی زیورات رکھ کر تھیلیوں پر مہرثبت کرتے رہے۔ پولیس ہڑپہ نے 20 اپر یل کو نذیراحمدسینئر نائب صدر(SVP) دی پنجاب پروانشل کو اپریٹوبنک لمیٹڈ ساہیوال زون کی مدعیت میں ملزموں کے خلاف مقدمہ 420، 468، 471اور 408ت پ درج کرکے تفتیش شروع کردی ہے ۔ بنک انتظامیہ نے بینک منیجر ، اے سی آراو، کیشئرسمیت تمام اہلکاروں کو معطل کر دیا ہے ۔ اور پولیس ہڑپہ نے تین ملزموں کو گرفتار کر لیا ہے۔