جمعہ کے روزمساجد وامام بارگاہوں کی سکیورٹی کے فُول پروف انتظامات

جمعہ 9 مئی 2025 18:24

سرگودھا (اُردو پوائنٹ اخبارتازہ ترین - اے پی پی۔ 09 مئی2025ء) سرگودھا کی مساجد اور امام بارگاہوں میں موجودہ ملکی صورتحال اور جنگی حالات کے پیش ِ نظر نماز ِجمعہ اجتماعات میں وطن عزیز کی سلامتی اور بقاء کے لیے دعائیں کی گئیں۔ علماء اکرام نے ملکی سلامتی اور سرحدوں کے محافظوں ، مسلح افواج اور دیگرمیدانِ جنگ میں رہنے والے وطن ِ عزیز کے شیر دل سپوتوں کی کامیابی اور حفاظت کے لیے خصوصی دعائیں کی گئیں۔

نماز ِجمعہ کے سلسلہ میں ضلع بھر میں مساجد اور امام بارگاہوں پر سکیورٹی کےسخت انتظامات کیے گئے۔ ڈسٹرکٹ پولیس آفیسر سرگودہا محمد صہیب اشرف کی خصوصی ہدایت پرموجودہ ملکی حالات کے پیش ِ نظر ضلع بھر میں موجود اہم مساجد اور امام بارگاہوں پر سرگودھا پولیس کے پانچ سو سے زائد مسلح پولیس افسران و ملازمان نے ڈیوٹی سرانجام دی۔

(جاری ہے)

ایلیٹ فورس اور محافظ اسکواڈ کے جوان اہم مساجد اورامام بارگاہوں کے اردگرد گشت کناں رہے۔

اس کے علاوہ ٹریفک کی روانی کو برقرار رکھنے کے لیے ٹریفک پولیس کے جوان بھی الرٹ رہے۔ نمازِ جمعہ میں شامل ہونے والے ہر شخص، گاڑی، موٹر سائیکل وغیرہ کو مکمل چیکنگ کے بعد آنے دیا گیا۔ علاوہ ازیں چیکنگ کے لئے اہم پوائنٹس پر واک تھرو گیٹ اورمیٹل ڈیٹیکٹرکا بھی استعمال یقینی بنایا گیا۔ مساجداور امام بارگاہوں پر پارکنگ کا مناسب انتظام کیا گیا۔ سب ڈویژنل پولیس آفیسرز اور ایس ایچ اوزنے لگائی گئی ڈیوٹیز کو چیک کیااور ڈیوٹی کے حوالے سے بریف کیااورپولیس ملازمین کو الر ٹ رکھا۔ تمام سکیورٹی انتظامات کی ڈی پی او نے براہ راست خود نگرانی کی۔