قلات واقعہ افسوسناک ، دہشتگردی کے پیچھے بھارت ہے‘ رانا ثنا اللہ

عوام کو پریشانی سے بچانے کے لیے سوات طرز کا آپریشن نہیں کیا جا رہا‘ مشیر سیاسی امور

جمعرات 17 جولائی 2025 12:29

قلات واقعہ افسوسناک ، دہشتگردی کے پیچھے بھارت ہے‘ رانا ثنا اللہ

لاہور(اُردو پوائنٹ اخبارتازہ ترین - این این آئی۔ 17 جولائی2025ء)وزیر اعظم کے مشیر برائے سیاسی امور رانا ثنا اللہ نے قلات میں ہونے والے دہشت گردی کے واقعے کو افسوسناک قرار دیتے ہوئے کہا ہے کہ اس کے پیچھے بھارت کا ہاتھ ہے، دہشتگردوں کا ایجنڈا پاکستان مخالف ہے اور اس کے پیچھے بھارت کی مداخلت ہے۔ایک انٹر ویو میں انہوں نے کہا کہ بھارت اپنی ہزیمت کی خفت مٹانے کے لیے بے گناہ شہریوں کو نشانہ بنا رہا ہے۔

انہوں نے زور دیا کہ دہشتگردوں کی سیف ہیونز کو ختم کر دیا جائے تو یہ کافی حد تک کنٹرول ہو جائیں گے لیکن جب تک بھارت دہشتگردوں کی پشت پر ہے انہیں زیرو کنٹرول پر لانا ممکن نہیں۔انہوں نے کہا کہ دہشتگردوں کے لیے فنڈنگ اور سپورٹ بھارت سے آتی ہے اور پاکستان میں بھارت دہشتگردوں کی پشت پناہی کر رہا ہے،دہشتگردوں کی محفوظ پناہ گاہیں سرحد کی دوسری جانب موجود ہیں۔

(جاری ہے)

انہوں نے سوات آپریشن کی طرز پر آپریشن کرنے کے بارے میں کہا کہ اگر ایسا کیا گیا تو لوگوں میں پریشانی کی لہر دوڑ جائے گی لیکن آپریشن کی صورت میں پوری آبادی کو علاقے سے نکالنا مشکل نہیں ہوگا۔تاہم انہوں نے واضح کیا کہ عوام کو پریشانی سے بچانے کے لیے سوات طرز کا آپریشن نہیں کیا جا رہا۔رانا ثنا اللہ نے مزید کہا کہ پاکستان نے پوری دنیا کو شواہد پیش کیے ہیں کہ بھارت پاکستان میں پراکسی وار میں ملوث ہے۔