عازمین کو نجی حج پیکجز کی بکنگ میں احتیاط برتنے کا مشورہ، کوٹہ میں کمی کردی گئی

عازمین صرف مستند اور رجسٹرڈ منظمین کے ذریعے ہی بکنگ کروائیں تاکہ کسی قسم کی دھوکہ دہی یا مشکل سے بچا جا سکے، کسی بھی خلاف ورزی پر سخت قانونی کارروائی ہوگی؛ ترجمان وزارت مذہبی امور

ساجد علی اتوار 11 مئی 2025 13:17

عازمین کو نجی حج پیکجز کی بکنگ میں احتیاط برتنے کا مشورہ، کوٹہ میں کمی ..

اسلام آباد ( اُردو پوائنٹ اخبارتازہ ترین۔ 11 مئی2025ء ) وزارت مذہبی امور نے نجی سکیم کے عازمین حج کی آگاہی کے لیے ہدایت نامہ جاری کردیا جس میں وزارتِ مذہبی امور نے حج 2025ء کے لیے نجی حج سکیم کے تحت حج پیکجز کی بکنگ کرنے والے عازمین کو احتیاط برتنے کا مشورہ دیا، اس ضمن میں کہا گیا ہے کہ غیر تصدیق شدہ منتظمین یا کوٹے سے زائد بکنگ کی صورت میں سخت کارروائی کی جائے گی۔

وزارت کے ترجمان کا کہنا ہے کہ نجی منتظمین کو دیئے گئے کوٹے میں ترمیم کردی گئی ہے جس کے نتیجے میں اب یہ کوٹہ کل 25 ہزار 698 عازمین تک محدود کر دیا گیا ہے، حج 2025ء کے لیے کسی بھی اضافی کوٹے کی منظوری نہیں دی جائے گی۔ ترجمان نے کہا کہ تمام نجی منتظمین کو ہدایت کی گئی ہے کہ وہ صرف تصدیق شدہ اور مختص شدہ کوٹے کے مطابق ہی بکنگ کریں، ادائیگی سے قبل نجی منظم کی حیثیت اور حج کوٹے کی تازہ منظوری کی تصدیق لازمی کریں، منظور شدہ منتظمین کی فہرست اور کوائف کی تصدیق وزارت کی ویب سائٹ سے کریں، سوشل میڈیا یا دیگر ذرائع کی غیرمصدقہ معلومات یا اشتہارات پر ہرگز انحصار نہ کریں وزارت مذہبی امور کی جانب سے کہا گیا ہے کہ منتظمین بھی اپنے تصدیق شدہ کوٹے سے زائد بکنگ نہ کریں، کسی بھی قسم کی خلاف ورزی کی صورت میں وزارت سخت قانونی کارروائی کرے گی، ایک شفاف، ذمہ دار اور مربوط حج آپریشن کو یقینی بنانے کے لیے تمام ضروری اقدامات جاری ہیں اور عازمین سے بھی اپیل ہے کہ وہ صرف مستند اور رجسٹرڈ منظمین کے ذریعے ہی بکنگ کروائیں تاکہ کسی قسم کی دھوکہ دہی یا مشکل سے بچا جا سکے۔

(جاری ہے)