Live Updates

اگر چاند کی 14 تاریخ ہو تو بارش کا پانی سمندر میں نہیں جاتا، سعید غنی کی حیرت انگیز منطق

جب بارش آئی گی اور پانی آئے گا تو میں کوئی سُپرمین نہیں ہوں کہ اس پانی کو آ کر روک لوں، جب سڑک چلے گی اور راستہ بنے گا تو تب ہی ہم اس پر سے گزر سکیں گے؛ وزیر بلدیات سندھ کی گفتگو

ساجد علی بدھ 20 اگست 2025 12:19

اگر چاند کی 14 تاریخ ہو تو بارش کا پانی سمندر میں نہیں جاتا، سعید غنی ..

کراچی ( اُردو پوائنٹ اخبارتازہ ترین۔ 20 اگست 2025ء ) صوبہ سندھ کے وزیر بلدیات سعید غنی نے حیرت انگیز منطق پیش کرتے ہوئے کہا ہے کہ اگر چاند کی 14 تاریخ ہو تو بارش کا سارا پانی سمندر میں نہیں جاتا۔ سوشل میڈیا پر زیر گردش ویڈیو میں میڈیا سے گفتگو کے دوران انہیں یہ کہتے ہوئے سنا جا سکتا ہے کہ کراچی سے بارش کا سارا پانی سمندر میں جاتا ہے، ہماری پوری کوشش ہوتی ہے کسی طرح ہم جلد سے جلد پانی کو نکالیں لیکن اگر چاند کی 14 تاریخ ہو اور ان دنوں آپ توقع کریں کہ سمندر میں سارا پانی چلا جائے گا تو وہ نہیں جاتا ہے، یہ قدرتی نظام ہے جس کو سمجھنے کی ضرورت ہوتی ہے۔

ویڈیو میں سعید غنی یہ بھی کہہ رہے ہیں کہ کراچی شہر سطح سمندر سے نیچے ہے اور چاند کی جو تاریخیں ہوتی ہیں جن میں چاند مکمل ہوتا ہے تو اس وقت سمندر کی سطح بلند ہوتی ہے، اس وقت سمندر پانی اٹھاتا نہیں ہے، اب اگر کراچی سے پانی سمندر میں جارہا ہو اور سمندر کی سطح بلند ہو تو وہ پانی سمندر میں جائے گا نہیں، اس لیے کبھی کبھار یہ مشکلات بھی آتی ہیں، یہ اللہ کا نظام ہے اب یہ اس پر منحصر ہے کہ بارشیں کب اور کتنی ہوتی ہیں۔

(جاری ہے)

کراچی کا سارا پانی سمندر میں جاتا ہے ، اگر چاند کی کی 14 تاریخ ہو تو سارا پانی سمندر میں نہیں جاتا اس لیے نالے overflow کر گئے۔۔۔ سعید غنی pic.twitter.com/SWo3ZtlSNF
— Zubair Ali Khan (@ZubairAlikhanUN) August 20, 2025

اس کے علاوہ ایک ٹی وی انٹرویو کے دوران وزیر بلدیات سندھ نے کہا کہ جب بارش آئی گی اور پانی آئے گا تو آپ کیا توقع کرتے ہیں میں کوئی سُپرمین تو نہیں ہوں کہ اس پانی کو نیچے آ کر روک لوں، جب سڑک چلے گی اور راستہ بنے گا تو تبھی ہم اس پر سے گزر سکیں گے، ایسا نہیں ہے کہ پورا کراچی بارش کے پانی میں ڈوب گیا ہے، جن لوگوں کی جہاں ذمہ داریاں ہیں وہ وہاں موجود ہیں اور وہ کام کر رہے ہیں۔

جب بارش آئی گی اور پانی آئے گا تو میں کوئی سُپرمین نہیں ہوں کہ اس پانی کو نیچے آ کر روک لوں، وزیر بلدیات سندھ سعید غنی #Pakistan #KarachiRains #PPP pic.twitter.com/qG1TWnsjF8
— SAJID ALI (@SajidAli03) August 20, 2025