Live Updates

عمران خان نے ضمنی انتخابات کا معاملہ سیاسی کمیٹی پر چھوڑ دیا

سلمان اکرم راجہ کی قومی اسمبلی اور سینیٹ کیلئے اپوزیشن لیڈرز کی نامزدگی کی تصدیق

ساجد علی بدھ 20 اگست 2025 11:39

عمران خان نے ضمنی انتخابات کا معاملہ سیاسی کمیٹی پر چھوڑ دیا

اسلام آباد ( اُردو پوائنٹ اخبارتازہ ترین۔ 20 اگست 2025ء ) پاکستان تحریک انصاف کے سیکریٹری جنرل سلمان اکرم راجہ نے قومی اسمبلی اور سینیٹ کیلئے اپوزیشن لیڈرز کی نامزدگی کی تصدیق کردی۔ سپریم کورٹ کے باہر میڈیا سے گفتگو کرتے ہوئے انہوں نے بتایا کہ عمران خان نے قومی اسمبلی میں اپوزیشن لیڈر محمود خان اچکزئی اور سینٹ میں اپوزیشن لیڈر اعظم خان سواتی کو نامزد کیا ہے، پنجاب اسمبلی کےلئے 5 نام مانگے ہیں جن میں سے ایک کو نامزد کریں گے، جب کہ عمران خان نے ضمنی انتخابات کا معاملہ سیاسی کمیٹی پر چھوڑا ہے، انہوں نے ضمنی الیکشن میں حصہ لینے یا نہ لینے کا فیصلہ کرنے کا اختیار پی ٹی آئی کی سیاسی کمیٹی کو دیدیا ہے، آج شام کو اجلاس ہوگا تو فیصلہ کریں گے۔

ایک سوال کے جواب میں سلمان اکرم راجہ نے کہا کہ سہیل وڑائچ کا کالم میں نے پڑھا ہی نہیں، عمران خان کو جب پتہ چلے گا تو عمران خان کا مؤقف واضح ہو گا کہ ہم تحقیقات چاہتے ہیں تاکہ سچ سامنے آئے، تاریخ ہمیشہ حق کا ساتھ دیتی ہے، ہمیں معلوم ہے الیکشن کیسے اور کس نے لوٹا اور عدلیہ کے ساتھ کیا ہو رہا ہے؟ یہ کچھ سب قوم کے سامنے ہے، اس صورتحال میں تمام سیاسی جماعتوں کو اور تمام اداروں کو ایک ساتھ بیٹھنا ہوگا اور فیصلہ کرنا ہوگا کہ آگے کیسے بڑھنا ہے۔

(جاری ہے)

سیکریٹری جنرل پی ٹی آئی کا کہنا ہے کہ ایک گواہ کہتا ہے کسی طرح عمران خان کے پاس چلا گیا اور بات سن لی، دوسرا کہتا ہے میں زمان پارک چلا گیا اور ڈرائینگ روم میں گھس کر باتیں سنی تو یہ ایک مضحکہ خیز صورتحال پیدا ہو گئی ہے، اگر اس گواہی پر اور اس قسم کی شہادت پر عمارت کھڑی کی گئی یے تو یہ جھوٹ ہے فریب یے، نو مئی مقدمات کے حوالے سے عدالت سے سوال ہونا چاہیئے کہ جن پولیس والے گواہوں کی گواہی سرگودھا عدالت نے مضحکہ خیز قرار دی تھی ان گواہوں کی گواہی پر آپ کیسے سزائیں دے سکتے ہیں؟۔