Live Updates

18 سال کی کرپشن اور نااہلی نے کراچی کو ڈبو دیا، حلیم عادل شیخ کی سندھ حکومت پر تنقید

کل کی بارش نے ایک بار پھر ثابت کردیا کہ پیپلزپارٹی کراچی دشمن جماعت ہے، جسے عوام کی تکلیف اور شہر کی تباہی سے کوئی غرض نہیں؛ پی ٹی آئی رہنماء کا بیان

ساجد علی بدھ 20 اگست 2025 12:27

18 سال کی کرپشن اور نااہلی نے کراچی کو ڈبو دیا، حلیم عادل شیخ کی سندھ ..

کراچی ( اُردو پوائنٹ اخبارتازہ ترین۔ 20 اگست 2025ء ) پاکستان تحریک انصاف کے رہنماء حلیم عادل شیخ نے سندھ حکومت پر تنقید کرتے ہوئے الزام عائد کیا ہے کہ 18 سال کی کرپشن اور نااہلی نے کراچی کو ڈبو دیا، اس حوالے سے اپنے ایک بیان میں انہوں نے کہا کہ گزشتہ روز کراچی بارش کے بعد ڈوب گیا، شہر کی سڑکیں جھیلیں بن گئیں، لاکھوں گاڑیاں پھنسی رہیں، گھروں میں پانی داخل ہو گیا، لوگ بے یار و مددگار پھنسے رہے لیکن سندھ حکومت، پیپلزپارٹی کی کے ایم سی اور تمام بلدیاتی ادارے کہیں نظر نہ آئے۔

سابق اپوزیشن لیڈر سندھ اسمبلی کا کہنا ہے کہ اٹھارہ سال کی کرپشن اور نااہلی نے کراچی کو ڈبو دیا، عوام اپنی مدد آپ کے تحت سڑکوں پر تھے جب کہ حکمران عیاشیوں میں مصروف رہے، اللہ کے کرم سے پی ٹی آئی کے نمائندے اور تنظیم عوام کے درمیان موجود رہی اور خدمت کی، کل کی بارش نے ایک بار پھر ثابت کر دیا کہ پیپلزپارٹی کراچی دشمن جماعت ہے، جسے عوام کی تکلیف اور شہر کی تباہی سے کوئی غرض نہیں۔

(جاری ہے)

بتایا گیا ہے کہ کراچی میں موسلا دھار بارش کے بعد شہر میں اربن فلڈنگ کی صورتحال پیدا ہوگئی، بارش کے بعد کراچی کے کئی علاقے پانی میں ڈوب گئے، اس دوران سب سے بڑی شاہراہ شارع فیصل بھی پانی میں ڈوب گئی جہاں گاڑیاں تیرتی ہوئی نظر آئیں، میئر کراچی مرتضیٰ وہاب نے شارع فیصل کا دورہ کیا، میڈیا سے گفتگو میں انہوں نے کہا کہ 6 گھنٹے کی بارش کے بعد جمع ہونے والا پانی نکل رہا ہے، برساتی نالے صاف ہیں اور پانی کی نکاسی ہو رہی۔

محکمہ موسمیات نے بتایا ہے کہ گزشتہ 12 گھنٹوں کے دوران گلشن حدید میں سب سے زیادہ 170 ملی میٹر بارش ہوئی، اولڈ ائیرپورٹ ایریا میں 158، جناح ٹرمینل پر 152.8 ملی میٹر بارش ریکارڈ کی گئی، کراچی میں آج اور کل مزید بارش اور اربن فلڈنگ کی وارننگ جاری کی گئی ہے، جس کے باعث آج شہر بھر میں عام تعطیل کا اعلان کردیا گیا، وزیراعلیٰ سندھ سید مراد علی شاہ نے آج کراچی میں عام تعطیل کا اعلان کیا اور شہریوں کو غیر ضروری طور پر گھروں سے باہر نہ نکلنے کی ہدایت کردی گئی۔