Live Updates

عمران خان نے محمود خان اچکزئی کو اپوزیشن لیڈر قومی اسمبلی کیلئے نامزد کردیا

سابق وزیراعظم نے سینیٹ میں قائد حزب اختلاف کے عہدے کیلئے نامزدگی پر مزید مشاورت کی ہدایت کردی

ساجد علی بدھ 20 اگست 2025 10:57

عمران خان نے محمود خان اچکزئی کو اپوزیشن لیڈر قومی اسمبلی کیلئے نامزد ..

اسلام آباد ( اُردو پوائنٹ اخبارتازہ ترین۔ 20 اگست 2025ء ) پاکستان تحریک انصاف (پی ٹی آئی) کے بانی چیئرمین عمران خان نے اپوزیشن اتحاد کے سربراہ محمود خان اچکزئی کو قومی اسمبلی میں اپوزیشن لیڈر کیلئے نامزد کر دیا۔ میڈیا رپورٹس کے مطابق ذرائع کا کہنا ہے کہ سابق وزیراعظم نے راولپنڈی کی اڈیالہ جیل میں ان سے ملاقات کیلئے آنے والوں کو اپوزیشن لیڈر کی نامزدگی سے متعلق آگاہ کیا جب کہ سینیٹ میں قائد حزب اختلاف کے عہدے کیلئے نامزدگی پر مزید مشاورت کی ہدایت کی گئی ہے، تاہم اعظم سواتی سینیٹ میں قائد حزب اختلاف کے اب تک کے سب سے مضبوط امیدوار ہیں۔

بتایا جارہا ہے کہ 9 مئی کے مقدمات میں انسداد دہشت گردی عدالت کی طرف سے سزا سنائے جانے کی وجہ سے پی ٹی آئی رہنما عمر ایوب ناصرف قومی اسمبلی میں اپوزیشن لیڈر کے عہدے سے محروم ہوگئے بلکہ پبلک اکاؤنٹس کمیٹی سمیت قومی اسمبلی کی تمام قائمہ کمیٹیوں سے بھی انہیں ہٹا دیا گیا، الیکشن کمیشن نے عدالت کے فیصلے کے بعد عمر ایوب اور شبلی فراز کی نااہلی کا نوٹیفکیشن جاری کیا جس کے خلاف دونوں رہنماؤں نے پشاور ہائیکورٹ سے رجوع کیا ہوا ہے۔

(جاری ہے)

دوسری طرف سربراہ جے یو آئی ف مولانا فضل الرحمان نے قومی اسمبلی اور سینیٹ میں اپوزیشن لیڈرز کیلئے پی ٹی آئی کی حمایت کی ہے، ذرائع سے معلوم ہوا ہے کہ قومی اسمبلی اور سینیٹ میں اپوزیشن لیڈرز کی نامزدگی کیلئے سیاسی رابطے تیز ہوگئے ہیں، اس سلسلے میں تحریک انصاف کے وفد نے گزشتہ ہفتے کے دوران جے یو آئی ف کے سربراہ مولانا فضل الرحمان سے دو تفصیلی نشستیں کیں جن میں اہم قومی، سیاسی اور پارلیمانی امور پر بات چیت ہوئی۔

ذرائع کا کہنا ہے کہ ان ملاقاتوں کے دوران مولانا فضل الرحمان نے قومی اسمبلی اور سینیٹ میں اپوزیشن لیڈر کیلئے پی ٹی آئی کی حمایت کی، اس حوالے سے مولانا فضل الرحمان کا مؤقف ہے کہ دونوں ایوانوں میں اپوزیشن لیڈر پی ٹی آئی کا حق ہے اور وہ پارلیمان میں اپوزیشن کو متحد دیکھنا چاہتے ہیں، اس کے علاوہ ملک کو درپیش بحرانوں سے نکلنے کیلئے گرینڈ ڈائیلاگ وقت کی اہم ضرورت ہے۔