وفاقی حکومت کا پھل دار درختوں کی تجارتی شجر کاری کیلئے سٹرائیک ٹیم تشکیل دینے کا فیصلہ

پیر 12 مئی 2025 21:25

اسلام آباد (اُردو پوائنٹ اخبارتازہ ترین - این این آئی۔ 12 مئی2025ء)وفاقی حکومت نے پھل دار درختوں کی تجارتی شجر کاری کیلئے سٹرائیک ٹیم تشکیل دینے کا فیصلہ کرلیا۔ جاری بیان کے مطابق موٹرویز اور شاہرائوں کے اطراف موسمی مطابقت رکھنے والے پھل دار درختوں کی تجارتی شجرکاری کے منصوبے پر بین الوزارتی اشتراک کیلئے وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک اور وفاقی وزیر برائے مواصلات علیم خان کی زیر صدارت اجلاس کا انعقاد ہوا جس میں فیصلہ کیا گیا کہ یہ شجرکاری علاقائی اور موسمی حالات سے ہم آہنگ ہوگی اور ابتدائی تین سال کیلئے لیز پر دی جائے گی تاکہ نجی شعبے کی شمولیت ممکن ہو سکے۔

اس اقدام کا مقصد حکومتی اخراجات کے بغیر آمدنی کا حصول، ماحولیاتی بہتری، اور کاربن فٹ پرنٹ میں کمی کو یقینی بنانا ہے۔

(جاری ہے)

ڈاکٹر مصدق ملک نے زور دیا کہ اس منصوبے کی موثر تکمیل کے لیے دونوں وزارتوں کے مابین قریبی تعاون ضروری ہے۔ انہوں نے وزارتِ موسمیاتی تبدیلی کی جانب سے کاربن کریڈٹ کے حصول اور تکنیکی معاونت کی مکمل یقین دہانی کرائی۔

منصوبے پر فوری عمل درآمد کو یقینی بنانے کیلئے وفاقی وزیر نے 72گھنٹوں کے اندر ایک اسٹرائیک ٹیم تشکیل دینے کی ہدایت جاری کی جو عملی منصوبہ بندی، نفاذ کے طریقہ کار اور کاربن کریڈٹ کے حساب کتاب کے فریم ورک کی تیاری کی ذمہ دار ہوگی۔اجلاس میں موجود چیئرمین نیشنل ہائی وے اتھارٹی محمد شہریار سلطان اور انسپکٹر جنرل نیشنل ہائی ویز اینڈ موٹروے پولیس بی اے ناصر نے منصوبے کی کامیابی کیلئے مکمل ادارہ جاتی تعاون فراہم کرنے کا یقین دلایا۔