پنجاب پولیس کی کچہ کریمنلز کیخلاف بڑی کامیابی، بوسن گینگ کے 2 سرکردہ ڈاکو ہلاک

4ڈاکو زخمی بھی ہوئے ،پولیس ٹیموں نے ڈاکوئوں کے متعدد ٹھکانے تباہ کر دئیے، ترجمان پنجاب پولیس

منگل 13 مئی 2025 22:35

لاہور/راجن پور (اُردو پوائنٹ اخبارتازہ ترین - این این آئی۔ 13 مئی2025ء)پنجاب پولیس نے کچہ کریمنلز کے خلاف بڑی کامیابی حاصل کرتے ہوئے بوسن گینگ کے 2 سرکردہ ڈاکو ہلاک کر دئیے جبکہ 04 زخمی ہونے کی اطلاعات ہیں۔ ڈی پی او راجن پور کی قیادت میں ضلعی پولیس، سی سی ڈی راجن پور اور مظفر گڑھ کی ٹیموں کا بوسن گینگ کے خلاف ٹارگٹڈ آپریشن تیسرے روز بھی جاری رہا۔

(جاری ہے)

ترجمان پنجاب پولیس نے بتایا کہ پولیس ٹیموں اور ڈاکوئوں کے درمیان شدید فائرنگ کا تبادلہ ہوا۔ پولیس آپریشن کے دوران بوسن گینگ کے سرکردہ رکن التماس بوسن اور غضنفر بوسن کیفرکردار کو پہنچ گئے۔آپریشن میں راجن پور، مظفر گڑھ پولیس، سی سی ڈی اور ایلیٹ ٹیموں نے شرکت کی۔ ترجمان پنجاب پولیس مزید بتایا کہ پولیس ٹیموں نے ڈاکوئوں کے متعدد ٹھکانوں کو تباہ کر دیا ہے۔ آئی جی پنجاب ڈاکٹر عثمان انورنے بدنام زمانہ گینگ کے خطرناک ڈاکوں کی سرکوبی پر تمام پولیس ٹیموں کو شاباش دی ہے۔