جارح اسرائیلی جہازوں کو پرزوں کی فراہمی ، انسانی حقوق کی تنظیموں نے برطانوی حکومت پر مقدمہ دائر کردیا

بدھ 14 مئی 2025 09:10

لندن (اُردو پوائنٹ اخبارتازہ ترین - اے پی پی۔ 14 مئی2025ء) انسانی حقوق کے لیے کام کرنے والے اداروں کے ایک گروپ نے برطانوی حکومت پربین الاقوامی قوانین کی خلاف ورزی کا الزام لگاتے ہوئے کیس دائر کیا ہے،ان کا کہنا ہے کہ برطانیہ جارح اسرائیلی جہازوں کو پرزوں کی فراہمی کررہا ہے جو کہ بین الاقوامی قوانین کی خلاف ورزی ہے۔ فرانسیسی خبر رساں ادارے اے ایف پی کے مطابق گروپ کی جانب سے غزہ جنگ کے دنوں میں اسرائیل کو جنگی جہازوں کے پرزوں کی فراہمی کو بین الاقوامی قوانین کی خلاف ورزی قرار دیا گیا ہے۔

فلسطین کی تنظیم الحق کو ایمنسٹی، ہیومن رائٹس واچ اور آکسفیم سمیت دیگر اداروں کی حمایت حاصل ہے اور وہ چاہتی ہے کہ برطانوی حکومت اسرائیلی جہازوں کے لیے پرزوں کی فراہمی بند کرے جنہوں نے غزہ اور مغربی کنارے میں تباہی کے لیے امریکا کے جہاز استعمال کیے ۔

(جاری ہے)

ایمنسٹی یو کے کے سربراہ کا کہنا ہے کہ برطانیہ اسرائیل کو اہم پرز وں کی برآمد کی اجازت دے کر نسل کشی کو روکنے کے لیے اپنی قومی ذمہ داری نبھانے میں ناکام رہا ہے۔

اسی طرح آکسفیم کا کہنا ہے کہ جہاز میں ایندھن بھرنے، لیزر ٹارگٹنگ سسٹم، ٹائرز، ریئر فوسلیج اور سیٹ ایجیکٹنگ سسٹم برطانیہ کے بنے ہوئے ہیں۔آکسفیم اور الحق تنظیم کی حمایت کرنے والے وکلا کے مطابق برطانیہ کے بنے ہوئے پرزوں کی مسلسل فراہمی کے بغیر جہاز پروازیں جاری نہیں رکھ سکتے۔رپورٹ کے مطابق طویل عرصے سے جاری کیس کا تازہ مرحلہ یہ ہے کہ لندن ہائیکورٹ میں کیس کی چار روز تک سماعت ہو چکی ہے اور یہ واضح نہیں کہ اس کیس کا فیصلہ کب تک سامنے آئے گا۔گلوبل لیگل نیٹ ورک کے وکلا کا کہنا ہے کہ ان کی جانب سے سات اکتوبر 2023 کو اسرائیلی حملوں کے فوراً بعد کیس دائر کر دیا گیا تھا۔