2024 سے اب تک 5 ہزار 402 بھکاری مختلف ممالک سے ملک بدر ہوچکے، وزارت داخلہ

بدھ 14 مئی 2025 21:01

اسلام آبا د(اُردو پوائنٹ اخبارتازہ ترین - این این آئی۔ 14 مئی2025ء)وزارت داخلہ نے قومی اسمبلی میں انکشاف کیا ہے کہ سال 2024 سے لے کر اب تک 5 ہزار 402 پاکستانی بھکاریوں کو مختلف ممالک سے ملک بدر کیا جا چکا ہے۔وزارت داخلہ کی جانب سے قومی اسمبلی میں جمع کرائی گئی تحریری رپورٹ کے مطابق ملک بدر کیے گئے بھکاریوں کی سب سے زیادہ تعداد سعودی عرب سے سامنے آئی ہے، جہاں سے 5 ہزار 33 پاکستانی بھکاریوں کو واپس بھیجا گیا۔

2024 کے دوران مجموعی طور پر 4 ہزار 850 پاکستانی بھکاری بیرون ممالک سے ملک بدر کیے گئے جس میں سعودی عرب سے 4 ہزار 498، عراق سے 242، ملیشیا سے 55، اور متحدہ عرب امارات سے 49 بھکاریوں کو واپس بھیجا گیا۔رپورٹ میں بتایا گیا کہ سال 2025 میں اب تک 552 پاکستانی بھکاری ملک بدر کیے جاچکے ہیں جس میں سعودی عرب سے 535، یو اے ای سے 9، عراق سے 5 بھکاریوں کو واپس بھیجا گیا ہے۔

(جاری ہے)

فہرست میں قطر اور عمان جیسے خلیجی ممالک کا بھی ذکر کیا گیا ہے، تاہم وہاں سے ملک بدر کیے گئے افراد کی تعداد کی الگ تفصیل فراہم نہیں کی گئی۔وزارت داخلہ نے یہ اعداد و شمار قومی اسمبلی کے اجلاس میں پیش کیے، جس سے یہ واضح ہوتا ہے کہ بیرون ملک پاکستانیوں کی فلاح و بہبود اور ان کی سرگرمیوں پر مؤثر نگرانی کی اشد ضرورت ہے۔واضح رہے کہ گزشتہ سال سعودی حکومت نے یہ معاملہ پاکستانی حکومت کے سامنے اٹھایا تھا اور اس حوالے سے دونوں ممالک کے درمیان ایک معاہدہ طے پایا ہے۔